වැලිගම සිද්ධිය සම්බන්ධයෙන් සිදුවෙමින් පවතින විමර්ශනය ප්රධාන වශයෙන් ජාතික ජන බලවේගයේ ආධාරකරුවන් විසින් ඉදිරිපත් කරන ලද සාක්ෂි මත පදනම් වී ඇති බව රාජකාරි කිරීම තහනම් කරන ලද පොලිස්පති දේශබන්දු තෙන්නකෝන්ගේ නීති උපදේශක සංජීව වීරවික්රම පැවසීය.
පොලිස්පතිවරයාට එරෙහි චෝදනා විමර්ශනය කරන පාර්ලිමේන්තු කමිටුව ඉදිරියේ සිදු වන විභාගයේදී ඔහු මේ බව සඳහන් කළේය.
මේ නඩුවේ ඉදිරි කටයුතු සියල්ල දේශපාලන පක්ෂ ආධාරකරුවන්ගේ සාක්ෂි මත රඳාපැවතිය හැකි බව වීරවික්රම මෙහිදී පෙන්වා දුන්නේය. ඊට ප්රතිචාර දක්වමින් කමිටුවේ සභාපති ශ්රේෂ්ඨාධිකරණ විනිසුරු ප්රීති පද්මන් සූරසේන විමර්ශනයේදී මධ්යස්ථභාවයේ වැදගත්කම අවධාරණය කළේය. සාක්ෂිවල විශ්වසනීයත්වය තක්සේරු කිරීම සඳහා දේශපාලන පක්ෂ සාක්ෂිකරුවන් සිටී නම් ඔවුන් ඇතුළු සියලුම සාක්ෂිකරුවන් කැඳවිය හැකි බව ද විනිසුරුවරයා මෙහිදී පැවසීය.
ඊයේ (28) මේ කමිටුව හමුවට දේශබන්දු තෙන්නකෝන් කැඳවා තිබිණි. මෙහිදී පොලිස්පති තෙන්නකෝන් හෙළි කළේ දකුණු පළාතේ පොලිස් නිලධාරීන් කිහිප දෙනෙකු සංවිධානාත්මක අපරාධ කණ්ඩායම් නායක හරක් කටා සමඟ සම්බන්ධ මත්ද්රව්ය ජාවාරම් ජාලයකට සම්බන්ධ බවට චෝදනා එල්ල වී ඇති බවයි. බිය සහ පෞද්ගලික වාසි හේතුවෙන් සමහර නිලධාරීන්, විශේෂයෙන් මාතර ප්රදේශයේ නිලධාරීන්, මත්ද්රව්ය ජාවාරම්කරුවන් සමග සහයෝගයෙන් කටයුතු කිරීමට පෙළඹී ඇති බව ද ඔහු මෙහිදී වැඩිදුරටත් සඳහන් කළේය.
විමර්ශනයේ මේ අදියරේදී අනවශ්ය අදහස් දැක්වීමෙන් වළකින ලෙස විනිසුරු සූරසේන මෙහිදී පොලිස්පතිවරයාට උපදෙස් දුන්නේය.
වැලිගම සිද්ධිය පිළිබඳව තමන් මුලින්ම දැනගත්තේ දෙසැම්බර් 31 දින බව ද ඔහු පැවසීය.
පාර්ලිමේන්තු කමිටුවේ කටයුතු අතරතුර නීතිඥ වීරවික්රම සහ අතිරේක සොලිසිටර් ජනරාල් දිලීප පීරිස් අතර උණුසුම් වචන හුවමාරුවක් ද සිදු විය. මෙහිදී කමිටුවේ සභාපතිවරයා පැවසුවේ මේ විමර්ශනය පුරාවට විධිමත් සහ විනිවිදභාවය ආරක්ෂා කරගත යුතු බවත්, එහිදී වෘත්තීය ගෞරවය අතිශය වැදගත් බවත් ය.