පාර්ලිමේන්තුවේ සම්මත කරන ලද යෝජනාවට අනුව දේශබන්දු තෙන්නකෝන් පොලිස්පති ධුරයෙන් ඉවත් කිරීමේ කමිටුවට සාමාජිකයන් පත්කරයි.
2002 ඉහළ රාජ්‍ය නිලධරයන් ඉවත් කිරීමේ පනතට අනුව කතානායකවරයාගේ ප්‍රධානත්වයෙන් රැස්වන මේ කමිටුවට සාමාජිකයන් තිදෙනකු පත් කළ යුතුය. ඒ අතරින් එක් සාමාජිකයකු පත්කළ යුත්තේ අගවිනිසුරුවරයා ය. එම සාමාජිකයා ලෙස ශ්‍රේෂ්ඨාධිකරණයේ ජ්‍යේෂ්ඨ විනිසුරුවරයකු වන ප්‍රීති පද්මන් සූරසේන පත්කර ඇත. ජාතික පොලිස් කොමිෂන් සභාවේ සභාපති මහාධිකරණ විනිසුරු ලලිත් ඒකනායක මේ කමිටුවට නිල බලයෙන් පත් වී තිබේ.
අගමැති හරිනි අමරසූරියගේ සහ විපක්ෂ නායක සජිත් ප්‍රේමදාසගේ එකඟතාවෙන් කමිටුවට පත් කර ඇත්තේ නීල් ඉද්දවෙල ය. විනිසුරු ඉද්දවෙල අල්ලස් හෝ දූෂණ විමර්ශන කොමිෂන් සභාවේ සභාපතිවරයා මෙන්ම පාර්ලිමේන්තුවේ හිටපු නියෝජ්‍ය මහ ලේකම්වරයකු ද වේ.
මේ කමිටුව මගින් දේශබන්දු තෙන්නකෝන්ට එරෙහි චෝදනා විමර්ශනය කර සකස් කරන වාර්තාවක් පාර්ලිමේන්තුවට ඉදිරිපත් කළ යුතුය. ඉන්පසු පාර්ලිමේන්තුවේ බහුතරයෙන් එය සම්මත කිරීමෙන් පසු, පොලිස්පතිවරයා ධුරයෙන් ඉවත් කළ හැකිය.