ලෝක කුසලාන පාපන්දු තරගාවලියක අවසන් පූර්ව වටයට සුදුසුකම් ලැබූ පළමු අප්‍රිකානු රට බවට පත්වීමට මොරොක්කෝව ඊයේ (11) සමත් විය.
ඔවුන් එම අවස්ථාව දිනාගත්තේ අර්ධ අවසන් පූර්ව තරගයේදී සුපිරි ක්‍රීඩක ක්‍රිස්ටියානෝ රොනාල්ඩෝ ප්‍රමුඛ ප්‍රබල පෘතුගාලය 1 – 0 ක් ලෙස පරාජයට පත්කරමින් ය. මෙවර ලෝක කුසලාන තරගාවලිය ආරම්භයේ සිට ම මෙවැනි අනපේක්ෂිත ජයග්‍රහණ සහ පරාජයන් රැසක් දැකිය හැකි විය.
සිය ලෝක කුසලාන සිහිනය බොඳ වුණු රොනාල්ඩෝ තරගයේ අවසන් විසිල් හඬ නැගෙනවාත් සමගම හඬමින් පිටියෙන් ඉවත්ව සෘජුව ම ක්‍රීඩා විවේකාගාරය වෙත පියවර මනිනු දක්නට ලැබිණි. අද තරගයේදීත් අතිරේක ක්‍රීඩකයෙකු ලෙස කණ්ඩායම නියෝජනය කළ රොනාල්ඩෝ 51 වැනි මිනිත්තුවේදී පිටියට පිවිසියද, තරගයේ ප්‍රතිඵලය වෙනස් කිරීමට ඔහුට හැකි වූයේ නැත.
මෙරොක්කෝව පළමු අර්ධයේදී ම ගෝලයක් ලබාගනිමින් තරගයේ පීඩනය පෘතුගාලය වෙත යොමුකිරීමට සමත් විය. නමුත් දෙවැනි අර්ධයේදී ලැබුණු අවස්ථා කිහිපයක්ම අසාර්ථක කරගැනීම හේතුවෙන් පෘතුගාල ක්‍රීඩකයන්ට සිදු වුණේ ලෝක කුසලාන සිහිනය අතහැර යළි සිය රට බලා යෑමටයි.