ශ්‍රේෂ්ඨාධිකරණය මගින් රාජකාරි කිරීම අත්හිටුවන ලද පොලිස්පති දේශබන්දු තෙන්නකෝන් ඇතුළු සැකකරුවන් 06 දෙනකු අත්අඩංගුවට ගෙන අධිකරණයට ඉදිරිපත් කරන ලෙස මාතර මහෙස්ත්‍රාත් අධිකරණය අපරාධ පරීක්ෂණ දෙපාර්තමේන්තුවට නියෝග කර තිබේ.
2023 දෙසැම්බර් 31 වැනිදා මාතර, වැලිගම, පැලෑන වට රවුමේ පිහිටි ඩබ්ලිව් 15 හෝටලය ඉදිරිපට සිදු වූ වෙඩි තැබීමට අදාළ ව මේ නියෝගය නිකුත් කර ඇත. මේ සිදුවීම සම්බන්ධයෙන් 6314/23 අංකය යටතේ විභාග වන නඩුවට අදාළ ව මනුෂ්‍ය ඝාතනයක් සඳහා කුමන්ත්‍රණය කිරීමේ චෝදනාව යටතේ පොලිස්පති දේශබන්දු තෙන්නකෝන්, කොළඹ අපරාධ කොට්ඨාසයේ හිටපු ස්ථානාධිපති ඇන්ස්ලම් සිල්වා ඇතුළු සැකකරුවන් 06 දෙනකුට එරෙහිව මේ නියෝගය නිකුත් කර ඇත.
වැලිගම ඩබ්ලිව් 15 හෝටලයට වෙඩිතැබීමේ සිදුවීමේදී එක් පොලිස් නිලධාරියකු මියගියේය.
මේ ප්‍රහාරය සඳහා කොළඹ අපරාධ කොට්ඨාසයේ නිලධාරීන් වැලිගමට ගොස් තිබූ අතර, ඒ පිටුපස වෙනත් ගනුදෙනුවක් තිබී ඇතැයි ද මේ වන විට අනාවරණය වී තිබේ. මෙසේ කොළඹින් ගිය පිරිසට වැලිගම පොලිසියේ නිලධාරීන් කරන ලද වෙඩිතැබීමේදී කොළඹ අපරාධ කොට්ඨාසයේ සැරයන්වරයකු මියගොස් තිබිණි.
කොළඹ හිටපු නගරාධිපති ඒ.ජේ.එම්. මුසම්මිල්ගේ පුත්‍රයාට ඩබ්ලිව් 15 හෝටල් සමූහය අයත් වේ.