‘අපි හැමෝම වමේ දේශපාලන බලවේග. අපි ඉදිරි මැතිවරණය සම්බන්ධයෙන් අපිත් එක්ක හිටපු හැමෝම එක්ක සාකච්ඡා කරන්න සූදානම්’ යනුවෙන් පාර්ලිමේන්තු මන්ත්‍රී නාමල් රාජපක්ෂ අද (10) පැවසීය.
බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණු මූලස්ථානයේ පැවති සාකච්ඡාවකින් පසු මාධ්‍යයට අදහස් දක්වමින් මන්ත්‍රීවරයා සඳහන් කළේ නීත්‍යනුකූල ව කඩිනමින් පැවැත්විය යුතු වන්නේ පළාත් පාලන මැතිවරණය බවයි. එම මැතිවරණයට සූදානම් වන ආකාරය සම්බන්ධයෙන් අද මූලික සාකච්ඡාවක් පැවැත්වූ බව ද මන්ත්‍රීවරයා පැවසීය.
අපිට ගැටළු නෑ
‘අපිත් එක්ක ඉන්න හැමෝම පොදුජන පෙරමුණත් එක්ක ඉස්සරහට යන්න සූදානම්. ඒකෙ කිසි ගැටළුවක් නෑ. අපේ රටේ අරගලවලින් ආණ්ඩු වෙනස් කරනවද, මැතිවරණවලින් ආණ්ඩු වෙනස් කරනවද කියන එක අපි තීරණය කරන්න ඕනෙ. අපි ප්‍රජාතන්ත්‍රවාදී විය යුතුයි.’
නීතිය දැන් හරි
වැඩිදුරටත් මෙහිදී අදහස් දක්වමින් මන්ත්‍රීවරයා මෙසේ ද සඳහන් කළේය.
‘ජනාධිපතිවරයා නීතිය හා සාමය තහවුරු කරන්න අවශ්‍ය කටයුතු කරගෙන යනවා. බදු එක්ක ජනතාවට යැපෙන්න අමාරුයි. ඒක අපි දන්නවා. අපි ඒ ගැන අවධානය යොමුකරනවා. මේ ජීවන වියදමේ වැඩි වීම ලංකාවට විතරක් අදාළ දෙයක් නෙමෙයි, ඇමෙරිකාව, එංගලන්තය මේ හැම රටටම මේ තත්ත්වය අදාළයි.’
අපි ප්‍රතිපත්ති හදලා දෙන්නම්
තරුණයන් රැකියා අවස්ථා සඳහා සීග්‍රයෙන් විදේශගත වීම සම්බන්ධයෙන් ද මන්ත්‍රීවරයා මෙහිදී මාධ්‍ය වෙත අදහස් පළකළේය.
‘තරුණයන්ට මේ රට ගැන විශ්වාසයක් ඇති කරන්න නම් අපි ප්‍රතිපත්ති වෙනස් කරන්න ඕනෙ. ඒ සඳහා අපි ප්‍රතිපත්ති ක්‍රියාත්මක කිරීම සඳහා කොමිසමක් යෝජනා කරලා තියෙනවා ජාතික සභාව විදිහට. විධායකය යටතේ පාර්ලිමේන්තුවට වගකියන ආයතනයක් පිහිටුවන්න අපි ඒ හරහා මැදිහත් වෙනවා. මොන දේශපාලන පක්ෂය බලයට ආවත් නිවැරදි ප්‍රතිපත්තියක් තිබුණොත් ගැටළුවක් වෙන්නෙ නෑ. මේ තරුණයො ලෝකයේ රැකියා වෙළෙඳපොළට ගැලපෙන විදිහට අපි හදන්න ඕනෙ.’