එළැඹෙන පළාත් පාලන මැතිවරණයේදී මහ නගර සභා කිහිපයකට අලියා ලකුණින් තරග කිරීමට එක්සත් ජාතික පක්ෂය තීරණය කර තිබේ.
හිටපු ජනාධිපති සහ පක්ෂ නායක රනිල් වික්‍රමසිංහගේ ප්‍රධානත්වයෙන් ඊයේ සිරිකොත මූලස්ථානයේ පැවති කෘත්‍යාධිකාරී මණ්ඩල රැස්වීමේදී මෙම තීරණයට එළැඹ ඇතැයි වාර්තා වේ. මෙම හමුවේදී නව පත්කිරීම් සිදුකෙරුණු අතර ඉදිරි මැතිවරණ සහ වත්මන් දේශපාලන තත්ත්වය වැනි ප්‍රධාන මාතෘකා පිළිබඳව සාකච්ඡා කර තිබේ.
පක්ෂයේ උපායමාර්ගයේ කොටසක් ලෙස ‘අලියා’ ලකුණින් නගර සභා හතරකට තරග කිරීමට යෝජනා වී ඇත.
කොළඹ, මහනුවර, ගාල්ල සහ නුවරඑළිය මහ නගර සභා ඊට ඇතුළත් වේ.
මෙම යෝජනාවට කෘත්‍යාධිකාරී මණ්ඩල සාමාජිකයන්ගේ බහුතරයගේ සහයෝගය ලැබී ඇති අතර, එම නගර සභා පක්ෂයට සාර්ථකත්වයට ප්‍රබල අවස්ථාවක් ලබාදෙන බව එජාපය විශ්වාස කරයි.
ඊට අමතරව අනෙකුත් පළාත් පාලන ආයතනවලට තරග කිරීම සඳහා අනෙකුත් දේශපාලන පක්ෂ සමඟ සන්ධානගත වීම පිළිබඳව ද එක්සත් ජාතික පක්ෂය සළකා බලමින් සිටියි.
වෙනම ලකුණකින් තරග කිරීමට ඇති හැකියාව පිළිබඳව තවදුරටත් සාකච්ඡා පැවැත්වෙන අතර පෙබරවාරි 20 වැනිදාට පෙර මේ සම්බන්ධයෙන් අවසන් තීරණයක් ගැනීමට බලාපොරොත්තු වන බව ද වාර්තා වේ.
මේ අතර එක්සත් ජාතික පක්ෂය, සමගි ජන බලවේගය සමඟ ද සාකච්ඡා වටයක නිරත වී ඇති අතර, දෙපාර්ශවය අතර දැනටමත් සාකච්ඡා වට කිහිපයක්ම පවත්වා තිබේ.