නීතිපතිට විරෝධය පළකරන තරුණ ජනමාධ්‍යවේදීන්ගේ ලිපිය ලන්ඩන් මහ කොමසාරිස් බාරගනී : පොරොන්දුවකුත් දෙයි !

සන්ඩේලීඩර් පුවත්පතේ හිටපු කර්තෘ නීතිඥ ලසන්ත වික්‍රමතුංග මහතා ඝාතනය කිරීමේ සිද්ධියේ සාක්කි වසන් කළ බවට සැකපිට අත්අඩංගුවට ගෙන ඇප මත සිටින හිටපු නියෝජ්‍ය පොලිස්පතිවරයා, උප පොලිස් පරීක්ෂකවරයා සහ යුද හමුදාවේ හිටපු සැරයන්වරයාට එරෙහිව ඉදිරි නීතිමය ක්‍රියාමාර්ග නොගැනීමට නීතිපති දෙපාර්තමේන්තුව ගෙන ඇති තීරණය තරුණ ජනමාධ්‍යවේදීන්ගේ සංගමය ලෙස අපි හෙළා දකිමු.

නීතිපති පාරින්ද රණසිංහ මහතා මෙම තීරණය ගෙන ඇත්තේ එම දෙපාර්තමේන්තුවේ ජ්‍යෙෂ්ඨ රජයේ නීතිඥවරයකු වූ ජනක බණ්ඩාර මහතා ගල්කිස්ස මහේස්ත්‍රාත් අධිකරණයට පැමිණ මෙම සැකකරුවන්ට එරෙහිව ප්‍රමාණවත් සාක්කි ඇති බැවින් ඔවුන්ට ඇප ලබා නොදෙන ලෙස 2018 අප්‍රේල් 23 වැනිදා ඇතුළු දින කිහිපයකදීම මහේස්ත්‍රාත්වරයාගෙන් ඉල්ලීම් කර තිබියදීය.

ගල්කිස්ස මහේස්ත්‍රාත් අධිකරණයේ පවතින 92/2009 අංක දරණ ලසන්ත වික්‍රමතුංග මහතා ඝාතනය කිරීමට අදාල නඩුවේ සැකකරුවකු ලෙස 2010 වසරේදී අත්අඩංගුවට ගත් කන්දේගෙදර පියවංශ නම් යුද හමුදා නිලධාරියාට එරෙහිව ද මෙලෙස නීති මගින් කටයුතු නොකරන බව කියමින් ඔහු මුදා හැරීමට සැලැස්වූ අතර ඉන් පසු විමර්ශන අතරමග නතර කර තිබිණි. යළි 2015 වසරේදී මෙම විමර්ශන අපරාධ පරීක්ෂණ දෙපාර්තමේන්තුවට බාරදීමෙන් පසු විමර්ශන සිදුවූයේ වර්තමාන මහජන ආරක්ෂක අමාත්‍යංශ ලේකම් රවී සෙනවිරත්න මහතාගේ සහ එවකට අපරාධ පරීක්ෂණ දෙපාර්තමේන්තුවේ අධ්‍යක්ෂ ශානි අබේසේකර මහතාගේ අධීක්ෂණය යටතේය.

නීතිපතිවරයා සැකරකුවන්ට එරෙහිව ඉදිරි කටයුතු නොකිරීමට තීරණය කර ලිපිය යොමු කරන්නේ කළු ජනවාරිය සිහිපත් කරමින් ජනමාධ්‍ය සංවිධාන සහ මාධ්‍ය සමාජය විවිධ වැඩසටහන් සිදු කරන අතුරතුරදී සහ ලසන්ත වික්‍රමතුංග මහතා ඝාතතය කළ දිනය වූ ජනවාරි 08 අනුස්මරණය කර සති තුනක් ඉක්ම යද්දී වීම විශේෂත්වයකි.

ශ්‍රී ලංකාවේ ජනමාධ්‍යවේදීන් ඝාතනය කිරීම, පැහැරගෙන යාම ඇතුළු අපරාධ සම්බන්ධයෙන් එවකට විපක්ෂ මන්ත්‍රීවරයකු වූ වර්තමාන ජනමාධ්‍ය අමාත්‍ය නලින්ද ජයතිස්ස මහතා ඇසූ ප්‍රශ්නයකට පිළිතුරු ලෙස 2016 නොවැම්බර් 18 වැනිදා එවකට නීතිය හා සාමය අමාත්‍ය සාගල රත්නායක වාර්තාවක් ඉදිරිපත් කරමින් සිද්ධි 125ක් ගැන කරුණු ඉදිරිපත් කළේය. එම කරුණු ඉදිරිපත් කිරීමෙන් පසු සාක්කි විනාස කිරීම ගැන බරපතල ලෙස විවේචනය කළ නලින්ද ජයතිස්ස මහතා ජනමාධ්‍ය අමාත්‍යවරයාව සිටියදීම මෙවැනි නිදහස් කිරීමක් සිදුවීම උත්ප්‍රාස ජනක කාරණයක් වන අතර ජනමාධ්‍ය අමාත්‍යවරයා හෝ අධිකරණ අමාත්‍යවරයා මේ වන තෙක් පිළිගත හැකි ප්‍රකාශයක් මේ වන තෙක් සිදු කර නැතිවීම ද බරපතල තත්ත්වයක් සේ අපි සලකමු.

එසේ හෙයින් නීතිපතිගේ ක්‍රියාකලාපය ගැන වහාම පරීක්ෂණයක් සිදු කරන ලෙස අපි බල කර සිටිමු.