ආගමන විගමන පාලක හර්ෂ ඉලුක්පිටියගේ ඇප ඉල්ලීමක් සලකා බැලීම ලබන 27 වැනිදා සිදුකරන බව ශ්‍රේෂ්ඨාධිකරණය දැනුම් දෙයි.
අධිකරණයට අපහාස කිරීමේ චෝදනාවට රක්ෂිත බන්ධනාගාරගත කර සිටින ආගමන විගමන පාලකවරයා වෙනුවෙන් ඔහුගේ නීතිඥවරු අද (22) මේ ඉල්ලීම කළහ. එහිදී ත්‍රිපුද්ගල විනිසුරු මඩුල්ල තීරණය කළේ 27 වැනිදා ඒ ඉල්ලීම සලකා බැලීමට ය.
විද්‍යුත් වීසා නිකුත් කිරීමේ ක්‍රමය අභියෝගයට ලක්කරමින් ගොනුකර තිබූ මූලික අයිතිවාසිකම් පෙත්සම් සම්බන්ධයෙන් ශ්‍රේෂ්ඨාධිකරණය ලබාදුන් අතුරු තහනම් නියෝගයක් ක්‍රියාත්මක කිරීම පැහැරහැරීමෙන් අධිකරණයට අපහාස කිරීම පිළිබඳව ආගමන විගමන පාලකවරයාට චෝදනා එල්ල වී තිබේ.
2024 සැප්තැම්බර් 25 වැනිදා ආගමන විගමන පාලකවරයා රක්ෂිත බන්ධනාගාරගත කෙරිණි. විද්‍යුත් වීසා ක්‍රමය පිළිබඳ මේ මූලික අයිතිවාසිකම් පෙත්සම් ගොනු කර තිබුණේ හිටපු පාර්ලිමේන්තු මන්ත්‍රීවරුන් වන එම්.ඒ. සුමන්තිරන්, රාවුෆ් හකීම් සහ පාඨලී චම්පික රණවක විසිනි.