හිටපු ජනාධිපති ගෝඨාභය රාජපක්ෂ විසින් 2020 ජනවාරි මාසයේදී කරන ලද පත්කිරීමක් පෙරේදා (07) පාර්ලිමේන්තුවේ උසස් නිලතල පිළිබඳ කාරකසභාවෙන් අනුමත කර තිබේ.
මෙසේ පත්වීමෙන් වසර 02කුත්, මාස 11කට පසු අනුමැතිය ලබාදී ඇත්තේ සිවිල් ගුවන් සේවා අධිකාරියේ සභාපති උපුල් ධර්මදාසට ය. මේ සමග ම අදාළ කාරකසභාව මගින් ප්‍රාදේශීය සංවර්ධන බැංකුවේ සභාපති ලෙස මහින්ද සාලියගේ නමත්, ඉඩම් සංවර්ධනය කිරීමේ සංස්ථාවේ සභාපති ලෙස එච්.එස්. බාලසූරියගේ නමත් අනුමත කර ඇත. කුවේට්හි ශ්‍රී ලංකා තානාපති ලෙස කන්තීපන් බාලසුබ්‍රමනියම්ගේ නමත් පාර්ලිමේන්තුවේ උසස් නිලතල පිළිබඳ කාරකසභාවෙන් අනුමත කර ඇත්තේ පසුගිය 07දා ය.
උපුල් ධර්මදාස යනු කවුද?
ගෝඨාභය රාජපක්ෂ ඇතුළු ඔහුගේ පවුලේ සාමාජිකයන්ගේ සියලු ඇමෙරිකානු සංචාර පිළිබඳ සම්පූර්ණ වගකීම දරන්නේ මෙම උපුල් ධර්මදාස ය. ඔහු ඇමෙරිකාවේ ලොස්ඇන්ජලීස්හි සංචාරක ඒජන්සියක් පවත්වාගෙන යන්නෙකි. 2019 අප්‍රේල් මාසයේදී හදිසියේ ලංකාවට පැමිණීමට අවශ්‍ය වූ අවස්ථාවේ ද ගෝඨාභය රාජපක්ෂට සහ ඔහුගේ බිරිඳ අයෝමා රාජපක්ෂට සියලු පහසුකම් සපයා ඇත්තේ උපුල් ධර්මදාස විසින් ය.
ගෝඨා හදිසියේ පනී !
සන්ඩේ ලීඩර් පුවත්පතේ ආරම්භක කර්තෘ ලසන්ත වික්‍රමතුංග ඝාතන සිදුවීමට අදාළ ව ඔහුගේ දියණියක වන අහිම්සා වික්‍රමතුංග විසින් ඇමෙරිකාවේ පවරන ලද නඩුවට අදාළ ව ගෝඨාභය රාජපක්ෂට අධිකරණය ඉදිරියේ පෙනීසිටීමට සිදු වූ අවස්ථාවේ හදිසියේ මෙසේ එරටින් පිට විය. පසුව අනාවරණය වූයේ ඩුබායි – එමිරේට්ස් ගුවන් සමාගම මගින් මෙහෙයවන Skywards Platinum මගින් ගෝඨාභය රාජපක්ෂ සහ බිරිඳ මෙරටට පැමිණ ඇති බවයි. එය අධික වියදම් සේවයක් වන අතර, ඊට අදාළ ආසන වෙන්කිරීමේ කටයුතු ද සිදු කර ඇත්තේ ඒජන්සියක් හරහා නොව, සෘජුව ම ය.
මේ සියලු කටයුතු සඳහා මැදිහත් වී ඇත්තේ උපුල් ධර්මදාස ය. සන්ඩේ ඔබ්සර්වර් පුවත්පතේ ඊට දින කිහිපයකට පෙර පළකරන ලද CHECKMATE: Inside Ahimsa’s Legal Gambit against Gota ලිපියට අනුව එම නඩුවට අනිවාර්යෙන් පෙනීසිටීමට සිදු වන තත්ත්වයක ගෝඨාභය රාජපක්ෂ ඒ වන විට සිටියේය.
බැසිල් රාජපක්ෂට අදාළ සියලු හදිසි ඇමෙරිකානු සංචාර කළමනාකරණය කරන්නේ ද මේ උපුල් ධර්මදාස විසින් බව විශ්වාස කටයුතු ආරංචි මාර්ග තහවුරු කරයි.
ගෝඨාභය රාජපක්ෂ විසින් කරන ලද උපුල් ධර්මදාසගේ පත්කිරීම වෙනස් කිරීමට හෝ එය නැවත සලකා බැලීමට රනිල් වික්‍රමසිංහ ජනාධිපතිවරයා ද කටයුතු කර නැත.