ඔබ වැඩ ඇරී ආ
මගේ පස්වැනි උපන්දා සවස
නිල්වන් දෑස් ඇති
කහවන් කෙස් කලබැති
රන්වන් බෝනික්කෙකු
මට ලැබිණ
ඇගේ කෙහෙරැලි අල්ලා
එවන් කෙහෙරැලි පැතූ මම
ඇගේ ඇසි පිය දැක
මගේ ඇසි පියන් ද එසේ යැයි මවා ගතිමි
ළා රත් ඒ කොපුල් පිරිමැද
ඈ වඩාගෙන ගොස් කැඩපතෙන්
මා වගේදැයි ඇසීමි
ළමා කල ගතවෙත් ම
කුටියෙහි බිත්ති අල්මාරියේ මුඳුනෙහි මැදට වී
සිට ගත් ඇය
මගේ හැම ඉරියව්වුවක් ම
බලා සිටියාය
ඔබේ ඔත්තුකාරියක මෙන්
මුල්වරට පෙම්පතක් ලැබුණ දින
මා ඇය පිටුපසට හරවා හිඳුවා
එය පොතක කවරයක් තුළ හෙවූයෙමි
එහෙත්
පසුවදා උදයේ
එය ඔබ අතෙහි විය
සොළොසැවිරිදි යොවුනියකට
බෝනික්කන් කුමටදැයි සිතුණු සවසක
ඇය බිත්ති රාක්කයෙන් ගත් මම
එතැන ටයිටැනික් චිත්‍රපටයේ ජැක් සහ රෝස්ගේ
පින්තූරයක් තැබුවෙමි
එදා ඔබ කෑම කෑවේ
වදනකුදු නො දොඩා නිහඬව ය
විසි දෙකේ උපන්දිනය දා මට
හංස යුවළක් තෑගි ලැබිණ
බෝනික්කා දෙවැනි තට්ටුවේ මුල්ලකට කර
හස යුවළ පළමු තට්ටුවේ තැබීමි
ඇය එදා මා අතේදී
ඇසිපිය නො ගසා ම උන්නා ය
සත්විසි වියේදී ඉරණම් ගමනට පෙර
මම ඇය අවසන් වරට අත ගා බැලීමි
ඇගේ හිස කෙස් වියැළී
නිල්පෑ දෙනෙත් මළානික වී තිබිණ
දෙවෙනි තට්ටුවේ මුල්ලෙන් ගෙන
ඇය මා සමඟ ගෙනියන්නට
මට එදා නො සිතිණ
සතළිස් එක්වැනි උපන්දාවට දෙමසකට පසු
ඔබේ නිශ්චල මුහුණ දකිනු පිණිස ආ මට
බෝනික්කා සිහි විය
එහෙත් ඇය
බිත්ති අල්මාරියේ දෙවෙනි තට්ටුවෙහි
මා තැබූ තැන නො සිටියාය
ඇය සිටියේ කොහේදැයි
දැන උන්නේ ඔබ පමණක් ම බව මම දනිමි.