ඉන්දීය අගමැති නරේන්ද්ර මෝදි ඉතා ඉක්මනින් ලංකාවේ සංචාරයක යෙදෙනු ඇති බව ලංකාවේ ඉන්දීය තානාපති සන්තෝෂ් ජා පවසයි.
අද (07) ලංකාවේ පිහිටි ඉන්දීය තානාපති කාර්යාලය නිල වශයෙන් මේ බව නිවේදනය කළ අතර, රාජ්ය නායකයන්ගේ පහසුව අනුව කඩිනමින් මේ සංචාරයට දින යොදාගනු ඇති බව ද තානාපති කාර්යාලය අවධාරණය කරයි.
ජනාධිපති අනුර කුමාර දිසානායකගේ දින 02ක ඉන්දීය නිල සංචාරයේදී එරට අගමැතිවරයාට මේ සඳහා නිල ආරාධනයක් කර තිබිණි. එහෙත් ඊට මෙතෙක් ඉන්දීය රජය කිසිදු ප්රතිචාරයක් දක්වා තිබුණේ නැත. අනුර කුමාර දිසානායක ජනාධිපතිවරයා ලෙස මුලින්ම නිල සංචාරයක් සඳහා තෝරාගෙන තිබුණේ ඉන්දියාව වන අතර, ඔහුට සුබ පැතීමට මුලින්ම පැමිණි රාජ්ය නිල නියෝජිතයා වූයේ ද ඉන්දීය විදේශ කටයුතු ඇමැති එස්.ජායිශංකර් ය.
2015 වසරේදී සහ 2017 වසරේදී ඉන්දීය අගමැති මෝදි ලංකාවේ සංචාර දෙකකට සහභාගි විය. මේ අතර ලබන 14 සිට 17 දක්වා ජනාධිපති දිසානායක චීනයේ නිල සංචාරයක යෙදීමට නියමිත ය.