වැඩ බලන පොලිස්පති ප්‍රියන්ත වීරසූරිය සහ පොලිස් දෙපාර්තමේන්තුවේ දෙවැනියා ලෙස කටයුතු කරන ජ්‍යෙෂ්ඨ නියෝජ්‍ය පොලිස්පති (පරිපාලන) ලලිත් පතිනායක අතර ගැටුම තීව්‍රවෙමින් පවතින බව පොලිස් දෙපාර්තමේන්තුවේ ඉහළ පෙළේ ආරංචි මාර්ග අනාවරණය කරයි.
පොලිස්පතිවරයා විසින් මහජන ආරක්ෂක අමාත්‍යංශයට දිගින්-දිගටම දැනුම් දී තිබුණේ ජ්‍යෙෂ්ඨ නියෝජ්‍ය පොලිස්පති (පරිපාලන) තමන්ගේ නියෝග ක්‍රියාත්මක නොකරන බවයි. මේ හේතුව නිසා පොලිසියේ පරිපාලන කටයුතු පිළිබඳ ගැටලු මතු වී ඇති බව ද ඔහු අමාත්‍යංශයට පෙන්වා දී ඇත.
මේ අතර විශ්වාස කටයුතු ආරංචි මාර්ග සඳහන් කරන ආකාරයට පොලිස් දෙපාර්තමේන්තුවේ පරිපාලනය බාර ජ්‍යෙෂ්ඨ නියෝජ්‍ය පොලිස්පති ධුරය දරන ලලිත් පතිනායක ජාතික පොලිස් කොමිෂන් සභාවට දැනුම් දී ඇත්තේ ජ්‍යෙෂ්ඨත්වය පිළිබඳව ගැටලු ඇති නිසා තමන්ට වැඩ බලන පොලිස්පතිවරයාගේ නියෝග පිළිපැදීම ප්‍රශ්නයක් වී ඇති බවයි. මේ සම්බන්ධයෙන් පොලිස් දෙපාර්තමේන්තුවේ ඉහළ නිලධාරීන් අතර ද බෙදීමක් මතුවෙමින් පවතින බව වාර්තා වන අතර, මහජන ආරක්ෂක අමාත්‍යංශය මේ පිළිබඳ හදිසි සාකච්ඡාවක් ද කැඳවීමට තීරණය කර ඇත.