මර්වින් සමුඅරන් අවුරුදු දාහතර
ගෙවුණත් දැනෙන්නේ අද ඊයේ විතර
ඔහු හා මතක දේ මැද අතරින් පතර
රසවත් කතාවක් ඇත ඒ හැම අතර
හිතමින් ලැබෙන පිළිතුර වේවිදැයි මොකක්
මර්වින් පෙරේරට දී මම කෝල් එකක්
හමුවෙමු ඉන්ටර්විව් එකකට උදේ ටිකක්
ඇහුවා දිනක් උදයෙක ඇති වුණත් සැකක්
ඉන්නේ ගෙදර අද නම් සොමියෙන් දවස
බර සංවාද අද බැහැ ගන්නට ඉවස
කයියක් ගහන්නට නම් නිවමින් පවස
එනවා නම් වරෙන් මේ පැත්තට හවස
එහෙනං ඉන්ටර්විව් එක පැත්තකින් තියා
අපි ලොකු කතාබහකට වැඩි දුරට නොයා
එක සිංදුවක් ගැනවත් කියනවද ඔයා
එය හැක තබන්නට මට පත්තරේ ලියා
මා සනසා ගැනයි විමසන්නට හිතුවේ
මේ ගැන හිතලු සමහර උදවිය ගෙතුවේ
එක එක කතා එක එක අයගෙන් මතුවේ
ඒ පිළිබඳව හරි තතු දැනගත යුතුවේ
ඒ ගැන එහෙම නම් පවසන්නම ඕනේ
කියමින් හතර මායිම දිග ඇරියානේ
තව කුකුසක් උඹට ඒ පිළිබඳ නෑනේ
කියලා මෙහෙම ඇහුවා ඔහු අවසානේ
බැඳලද නැද්ද කියපං මට උඹ තාම
නෑ කිව් සැනින් කිව්වේ “කදිමයි බෝම”
හනිමුන් දවසෙ සිංදුව අහපන් රෑම
සිංදුව අර්ථෙ තේරෙයි බොට හොදටෝම
මර්වින් අයියගේ ඒ රස හඬ පටය
ඇත්තේ මගේ ළග තව සුරුකුම්කොටය
එන්නේ දුකක් ඒ හඬ ඇහෙනා විටය
අදටත් වඩා එහි වටිනාකම හෙටය