සමගි ජන බලවේගයේ සභාපති සහ හිටපු පාර්ලිමේන්තු මන්ත්‍රී ඉමිතියාස් බාකීර් මාකර් විසින් එම බලවේගයේ නායක සජිත් ප්‍රේමදාසට සහ එහි මහ ලේකම් රංජිත් මද්දුමබණ්ඩාරට ලිපියක් යවමින් පක්ෂය ප්‍රතිසංවිධානය කිරීමේ අවශ්‍යතාව අවධාරණය කරයි.
බිම් මට්ටමේ සාමාජිකයන් සමග ඇති සම්බන්ධතා ශක්තිමත් කිරීම සඳහා පුළුල් ප්‍රතිසංවිධානයක අවශ්‍යතාව මෙසේ පක්ෂයේ සභාපතිවරයා විසින් පෙන්වා දී තිබේ.
නායකත්වය නිර්මාණය කිරීමේ ප්‍රයත්නයේදී කරණම් ගසන්නන් මගහරිමින් නායකත්වය සහ සාමාජිකත්වය අතර ශක්තිමත් සබඳතාවක් ගොඩනගාගැනීමේ අවශ්‍යතාව ද ඔහු එමගින් පෙනාව දී ඇත. අනාගත අභියෝග සඳහා සූදානම් වීමට පක්ෂය එහි ව්‍යුහය සහ මතවාදය පෙළගැස්වීමට තීරණාත්මක පියවර ගත යුතු බව ද ඔහු වැඩිදුරටත් එම ලිපිය මගින් පෙන්වා දෙයි.
මේ ලිපියේ පක්ෂය ප්‍රතිසංවිධානයට අදාළ සවිස්තරාත්මක නිර්දේශ 12ක් ඇතුළත් කර තිබේ.
සමගි ජන බලවේගයේ සභාපතිවරයා වැඩිදුරටත් මේ ලිපිය මගින් පෙන්වා දී ඇත්තේ පක්ෂයේ මතවාදය සාර්ථකව සමාජගත කිරීමට හැකි වන පරිදි එක් කණ්ඩායමක් ලෙස අදහස් හුවමාරු කරගැනීම සඳහා පක්ෂයේ සාමාජිකයන් ඉහළ සිට පහළට සංවිධානය කළ යුතු බවයි. පක්ෂය තුළ එකමුතුකමේ වැදගත්කම තහවුරු කරමින් සාමූහිකව තීරණ ගන්නා ලෙස ද ඔහු මෙමගින් ඉල්ලා ඇත. පක්ෂයේ අභ්‍යන්තර ප්‍රජාතන්ත්‍රවාදය සහතික කිරීමට හැකි සෑම අවස්ථාවකදීම වගකීම් පැවරීමට කටයුතු කරන ලෙසත් ඔහු යෝජනා කර තිබේ.
සමගි ජන බලවේගයේ සභාපතිවරයා වන ඉමිතියාස් බාකීර් මාකර් පසුගිය පාර්ලිමේන්තු මැතිවරණයේදී සජබ ජාතික ලැයිස්තුවේ සිටි අතර, එම බලවේගයට ලැබුණු මන්ත්‍රී ධුර පහෙන් එකක් ඔහුට ලබාදුන්නේ නැත.