තරුණ ඡන්දදායකයන්ට ඡන්දය ප්‍රකාශ කිරීමට හැකි වන පරිදි 2024 ඡන්ද හිමි නාම ලේඛනය භාවිත කරමින් පළාත් පාලන ඡන්දය පැවැත්වීමට අවශ්‍ය කටයුතු කරන ලෙස කැබිනට් මණ්ඩලය මගින් නීති කෙටුම්පත් දෙපාර්තමේන්තුවට උපදෙස් දෙයි.
මෙවැනි දැනුම්දීමක් කර ඇතැයි අද (11) ශ්‍රේෂ්ඨාධිකරණයේදී අනාවරණය විය. 2024 වසරේ ඡන්ද හිමි නාම ලේඛනය භාවිත කරමින් පළාත් පාලන ඡන්ද විමසීම පවත්වන්නැයි නියෝගයක් නිකුත් කරන ලෙස ඉල්ලා ගොනුකරන ලද මූලික අයිතිවාසිකම් පෙත්සමක් කැඳවූ අවස්ථාවේදී නීතිපතිවරයා වෙනුවෙන් පෙනීසිටි නියෝජ්‍ය සොලිසිටර් ජනරාල් නිර්මලන් විග්නේෂ්වරන් මේ බව ශ්‍රේෂ්ඨාධිකරණයට දැනුම් දුන්නේය.
අගවිනිසුරු මුර්දු ප්‍රනාන්දු, අර්ජුන ඔබේසේකර සහ ප්‍රියන්ත ප්‍රනාන්දු යන විනිසුරුවරුන්ගෙන් සමන්විත විනිසුරු මඩුල්ලක් ඉදිරියේ මේ පෙත්සම කැඳවනු ලැබිණි.
නියෝජ්‍ය සොලිසිටර් ජනරාල්වරයා මෙහිදී ශ්‍රේෂ්ඨාධිකරණයට වැඩිදුරටත් දැනුම් දුන්නේ මේ මැතිවරණයට බාරගෙන තිබෙන නාමයෝජනා අවලංගු කොට අලු‍තින් නාම යෝජනා බාරගැනීමට හැකි වන පරිදි නීති සංශෝධනය කරන ලෙස ද කැබිනට් මණ්ඩලයෙන් නීති කෙටුම්පත් දෙපාර්තමේන්තුවට උපදෙස් දී ඇති බවයි.
මෙහිදී පෙත්සම්කරුවන් වන දේශවිමුක්ති ජනතා පක්ෂයේ සාමාජික නිහාල් ද සිල්වා ඇතුළු පිරිස වෙනුවෙන් පෙනී සිටි ජනාධිපති නීතිඥ අලි සබ්රි කරුණු දක්වමින් පෙන්වා දුන්නේ මෙය ජනතාවට ඉතා වැදගත් නඩුකරයක් වන බවයි. එම නිසා සෑම පුද්ගලයකුටම මේ සඳහා මැදිහත් විය හැකි වන ආකාරයට පෙත්සම පිළිබඳව භාෂා තුනෙන් ම පුවත්පත්වල දැන්වීම් පළකිරීමේ නියෝගයක් නිකුත් කරන ලෙස ද ජනාධිපති නීතිඥවරයා ඉල්ලා සිටියේය. මේ ඉල්ලීමට අවසර දුන් ශ්‍රේෂ්ඨාධිකරණ විනිසුරු මඩුල්ල, පෙත්සමේ වගඋත්තරකරුවන් ලෙස නම් කර සිටින මැතිවරණ කොමිසමේ සභාපතිවරයා ඇතුළු අනෙකුත් වගඋත්තරකරුවන්ට නොතීසි නිකුත් කරන ලෙස ද නියෝග කළේය.
පෙත්සම ලබන ජනවාරි 29 වැනිදා යළි කැඳවීමට නියමිත ය.