2008 වසරේ බොරලැස්ගමුව ප්‍රදේශයේදී එවකට ඇමැතිවරයකු වූ මෛත්‍රිපාල සිරිසේන ගමන් කළ රථ පෙළට පැන ඔහු ඝාතනය කිරීමට තැත් කළ එල්ටීටීඊ සංවිධානයේ මරාගෙන මැරෙන බෝම්බකාරියක වන සම්මුගරාසා ගජබාලිනිට අනුබල දීම ඇතුළු අධිචෝදනා 17ක් යටතේ පවරා ඇති නඩුවේ විත්තිකරුවන් දෙදෙනා ඕනෑම ඇප කොන්දේසියක් යටතේ මුදාහරින ලෙසට කළ ඉල්ලීමක් කොළඹ මහාධිකරණ විනිසුරු ආර්. එස්. එස්. සපුවිද ඊයේ (28) ප්‍රතික්ෂේප කළේය.
සෙල්වරාසා කිරුබාකරන් හෙවත් ගොස්තාර් හෙවත් මොරිස් හා තම්බයියා ප්‍රකාශ් හෙවත් දනුෂ් නමැති එම විත්තිකරුවන් දෙදෙනා මේ වන විට වසර 15කට ආසන්න කාලයක් තිස්සේ රක්ෂිත බන්ධනාගාරගත කර සිටින බව පෙන්වා දෙමින් එම විත්තිකරුවන් දෙදෙනා වෙනුවෙන් පෙනී සිටි නීතිඥ සුරංග බණ්ඩාර හා අසිත විපුලනායක එම ඇප ඉල්ලීම කර තිබිණි.
එම විත්තිකරුවන් අත්අඩංගුවට ගෙන ඇත්තේ ත්‍රස්තවාදය වැළැක්වීමේ පනත යටතේ බවත් ඔවුන්ට එල්ල කර ඇත්තේ ද එම පනත යටතේ ගැනෙන චෝදනා බවත් පෙන්වා දෙමින් නීතිපතිවරයා වෙනුවෙන් පැමිණිල්ල මෙහෙයවූ රජයේ අධිනීතිඥවරයා එම ඇප ඉල්ලීමට විරුද්ධත්වය දක්වන ලදි.
එම විත්තිකරුවන්ට එරෙහිව නීතිපතිවරයා විසින් ගොනු කර ඇති චෝදනා සම්බන්ධයෙන් සාක්‍ෂි විභාගය කඩිනමින් ආරම්භ කිරීමට පියවර ගන්නා බව පෙන්වා දුන් විනිසුරුවරයා, පැමිණිල්ලේ සාක්‍ෂි විභාගය ලබන වසරේ අප්‍රේල් 28, 29 සහ 30 යන දින තුන තුළ පැවැත්වීමට ද දින නියම කළේය.
මරාගෙන මැරෙන බෝම්බ ප්‍රහාරයේදී පී. විජේරත්න හා දොන් ගුණපාල වීරසිංහ යන අයගේ මරණය සිදුකිරීමට කුමන්ත්‍රණය කිරීම හා තවත් පුද්ගලයන් පස්දෙනකුට බරපතළ තුවාල සිදුකිරීම ඇතුළු චෝදනා යටතේ විත්තිකරුවන් දෙදෙනාට එරෙහිව නීතිපතිවරයා එම නඩුව පවරා ඇත.