මැතිවරණ කොමිසම විසින් එළඹෙන වසරේ ජනවාරි 5 වැනිදා පළාත් පාලන මැතිවරණය ප්‍රකාශ කිරීමට සැලසුම් කරමින් සිටින බවත්, එම වසරේ මාර්තු 20 වැනිදා මැතිවරණය පැවැත්වීම සඳහා සූදානමින් සිටින බවත් මැතිවරණ කොමිසමේ සභෘපති නීතීඥ නිමල් පුංචිහේවා thetime.lk වෙත පැවසීය.
මාස දෙකක කාලය තුළ දිස්ත්‍රික්ක විසිහතරම ආවණය වන පරිදි පළාත් පාලන ඡන්දය පිළිබඳ අදාල අංශ දැනුවත් කිරීම් සිදුකර ඇතති බවත්, එළඹෙන දෙසැම්බර් 13 සහ 14 දෙදින පුත්තලම සහ ගම්පහ යන ප්‍රදේශ ආවරණය කිරීමෙන් අනතුරුව ඉතිරිවන්නේ කොලඹ දිස්ත්‍රික්කය පමණක් බවත් කොමිසමේ සභාපතිවරයා සඳහන් කරයි.
පළාත් පාලන මැතිවරණය පැවැත්වීම වලක්වාලීම සඳහා යෝජනාවක් පාර්ලිමේන්තුව තුළ සම්මත කරගැනීමේ උත්සහයක් පවතින අතර, එයට එරෙහිව යම් පාර්ශවයක් අධිකරණයේ සහය පැතීම සිදුකළහොත්, SCFR/35/2016 යන නඩු තීන්දුව ප්‍රකාරව ශ්‍රේෂ්ඨාධිකරණයෙන් යළි තීන්දුවක් ලබාගැනීමට හැකියාව පවතින බවත් ඔහු වැඩිදුරටත් පැවසීය. ඒ නිසා පළාත් පාලන මැතිවරණය අනිවාර්යයෙන්ම පැවැත්වීමට සිදුවන බවද හෙතෙම පැවසීය.
අවසන් වරට පළාත් පාලන මැතිවරණයක් පවත්වනු ලැබූයේ 2018 වර්ෂයේ පෙබරවාරි මාසයේදී ය. ඒ අනුව මෙම වසරේ ජනවාරි මාසයෙන් බෙන්තර-ඇල්පිටිය ප්‍රාදේශිය සභාව ඇරෙන්නට සෙසු ප්‍රාදේශිය සභාවල ධූර කාලය අවසන්වීම සිදුවිය.
ඒ අනුව ශ්‍රී ලංකාවේ පළාත් පාලන ආයතන 340ක් සඳහා වන පළාත් පාලන මැතිවරණය ලබන වසරේදී බොහෝ දුරට පැවැත්වෙනු ඇති අතර එහිදී මහනගර සභා 24ක්, නගර සභා 41ක් සහ ප්‍රාදේශිය සභා 275කට අදාලව නියෝජිතයන් පත්කරගැනීම සිදුවනු ඇත. එය 2017 අංක 16 දරණ පළාත් පාලන ආයතන ඡන්ද විමසීම් (සංශෝධන) පනත අනුව පැවැත්වීම සිදුවනු ඇත.