ඇමෙරිකානු ජනාධිපති ඩොනල්ඩ් ට්රම්ප් ඝාතන කොන්ත්රාත්තුවක් බාරදීම මෙන්ම ලංකාවේ සිටින ඊශ්රායල් ජාතිකයන් ඉලක්ක කිරීමේ මෙහෙයුම බාරව සිටි පුද්ගලයා ලෙස ඇමෙරිකානු අධිකරණ දෙපාර්තමේන්තුව මගින් අනාවරණය කරන ලද ෆර්හාඩ් ෂකේරි ලංකාවේදී අත්අඩංගුවට ගැනීමෙන් පසු නිදහස් වී ඇත්තේ පොලිස් මත්ද්රව්ය නාශක කාර්යාංශයේ වරද නිසා බව අනාවරණය වෙයි.
පොලිස් මත්ද්රව්ය නාශක කාර්යාංශය මගින් 2019 වසරේදී ෂකේරි අත්අඩංගුවට ගෙන ඇත්තේ මත්ද්රව්ය ජාවාරම් කිරීමේ චෝදනාව යටතේ බවත්, ඉන්පසු ඔහු කොළඹ, මැගසින් බන්ධනාගාරයේ එච් වාට්ටුවේ රඳවා සිට ඇති බවත් පොලිස් ආරංචි මාර්ග තහවුරු කරයි. ඊශ්රායල් ජාතිකයන්ට බලපෑමක් එල්ල කිරීමේ සැලසුම සම්බන්ධයෙන් දැනට අපරාධ හා ත්රස්ත විමර්ශන කොට්ඨාසය භාරයේ රඳවාගෙන ප්රශ්න කරන මාලදිවයින් ජාතිකයා ද මේ කාලයේදී ෂකේරි සමග එච් වාට්ටුවේ රිමාන්ඩ් කර තිබූ බව ද එම ආරංචි මාර්ග වැඩිදුරටත් සඳහන් කර සිටී.
2020 අප්රේල් 01 වැනිදා හෝ ඊට ආසන්න දිනකදී ලංකාවේ වෙරළට නාවික සැතපුම් 548කට වැඩි දුරකදී මත්ද්රව්ය තොගයක් ප්රවාහනය කරමින් සිටියදී ඉරාන ජාතිකයන් 07 දෙනකු ශ්රී ලංකා නාවික හමුදාව මගින් අත්අඩංගුවට ගෙන ඇත. මේ අතර ෆර්හාඩ් ෂකේරි ද සිට ඇති අතර, ඔවුන් සමග මත්ද්රව්ය කිලෝග්රෑම් 316ක් ද අත්අඩංගුවට ගෙන තිබේ.
කෙසේ වෙතත් පොලිස් මත්ද්රව්ය නාශක කාර්යාංශය මගින් මේ පිරිස සම්බන්ධයෙන් ඉදිරිපත් කළ සාක්ෂි පරස්පර වීම හේතුවෙන් ඔවුන්ට ඇප ලැබී තිබේ. පොලිස් ආරංචි මාර්ග සඳහන් කරන්නේ මත්ද්රව්ය නාශක කාර්යාංශය එහිදී නීතියට අනුව නිවැරදිව කටයුතු කළේ නම්, ෂකේරි ඇතුළු පිරිස වරදකරුවන් වන බවයි.
(මේ පිළිබඳව ඇමෙරිකාවේ එෆ්බීඅයි ආයතනය අධිකරණයට වාර්තා කළ කරුණු පිළිබඳ සම්පූර්ණ ලිපියක් බලාපොරොත්තු වන්න.)