තෙල්දෙණිය පොලිසිය මගින් අත්අඩංගුවට ගත් සැකකරුවකුගේ ලිංගයට නයි මිරිස් දියකර වත් කරීමේ සිද්ධියට අදාළ ව ගොනු කර ඇති මූලික අයිතිවාසිකම් පෙත්සමේදී පොලිස් නිලධාරීන් වෙනුවෙන් තමන් පෙනී නොසිටින බව නීතිපතිවරයා ශ්‍රේෂ්ඨාධිකරණයට දැනුම් දෙයි.
පෙත්සමේ 12 වැනි වගඋත්තරකරු ලෙස නම් කර ඇති නීතිපති වෙනුවෙන් පමණක් දෙපාර්තමේන්තුව පෙනී සිටින බව නියෝජ්‍ය සොලිසිටර් ජනරාල් මාධව තෙන්නකෝන් ශ්‍රේෂ්ඨාධිකරණයට අද (15) දැනුම් දුන්නේය.
මෙය ඉතා බරපතළ සිද්ධියක් බව ද නියෝජ්‍ය සොලිසිටර් ජනරාල්වරයා සඳහන් කළේය.
ඔහු මෙසේ සඳහන් කළේ එම සිද්ධියේ වින්දිත රුවන් ශාන්ත ප්‍රියදර්ශන විසින් ගොනුකරන ලද මූලික අයිතිවාසිකම් පෙත්සම ඊයේ යසන්ත කෝදාගොඩ සහ කුමුදුනී වික්‍රමසිංහ යන ශ්‍රෙෂ්ඨාධිකරණ විනිසුරුවරුන් ඉදිරියේ කැඳවූ අවස්ථාවේදී ය.
නීතිපතිවරයාට අමතරව පොලිස්පතිවරයා, තෙල්දෙණිය මූලස්ථාන පොලිස් පරීක්ෂකවරයා ඇතුළු තවත් 11 දෙනෙක් එහි වගඋත්තරකරුවෝ වෙති.
තෙල්දෙනිය පොලිසිය විසින් 2023 ජනවාරි 27 වානිදා මෙම වින්දිතයා අත්අඩංගුවට ගනු ලැබ නීතිවිරෝධීව රඳවා තබා ගනිමින් වදහිංසා කර ඇති බව ශ්‍රී ලංකා මානව හිමිකම් කොමිසම කළ විමර්ශනයේදී තහවුරු වූ බව මෙම මූලික අයිතිවාසිකම් පෙත්සමේ සඳහන් කර තිබේ.
ඒ අනුව පොලිස්පතිවරයා ඇතුළු සෙසු වගඋත්තරකරුවන්ට නොතීසි යොමු කරන ලෙස අධිකරණය පෙත්සම්කරුට අද නියෝග කළේය.
වින්දිත රුවන් ශාන්ත ප්‍රියදර්ශන වෙනුවෙන් නීතිඥ මනුෂිකා කුරේ මහත්මිය සහ නීතිඥ මාධව ඊරියගම සමඟ නිතිඥ සුරෙන් ඩී පෙරේරා මහතා පෙනී සිටියේය.
පෙත්සම දෙසැම්බර් 19 වැනිදා යළි කැඳවීමට නියම කෙරිණි.