පාස්කු ඉරිදා ත්රස්ත ප්රහාරය සම්බන්ධයෙන් සිදුකරන විමර්ශනවලට අදාළව අපරාධ පරීක්ෂණ දෙපාර්තමේන්තුවේ හිටපු ජ්යෙෂ්ඨ නියෝජ්ය පොලිස්පති රවී සෙනෙවිරත්න සහ එම දෙපාර්තමේන්තුවේ හිටපු අධ්යක්ෂ ශානි අබේසේකර මේ අවස්ථාවේදී අත්අඩංගුවට ගැනීමේ තීරණයක් නොමැති බව නීතිපතිවරයා අද (20) ශ්රේෂ්ඨාධිකරණයට දැනුම් දුන්නේය.
හිටපු නියෝජ්ය පොලිස්පති පාලිත සිරිවර්ධන ඇතුළු පොලිස් නිලධාරීන් කණ්ඩායමක් සිදු කළ පැමිණිල්ලකට අනුව සිදුකෙරෙන විමර්ශනවලට අදාළව තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා රවී සෙනෙවිරත්න සහ ශානි අබේසේකර ඉදිරිපත් කළ මූලික අයිතිවාසිකම් පෙත්සම් අද කැඳවූ අවස්ථාවේදී මේ දැනුම්දීම සිදු කර තිබේ.
මේ පෙත්සම් ප්රීති පද්මන් සූරසේන, අචල වෙංගප්පුලි සහ මහින්ද සමයවර්ධන යන ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ කැඳවා තිබිණි.
නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජනරාල්වරයා මෙහිදී සඳහන් කළේ මෙම විමර්ශනවලට අදාළව අපරාධ පරීක්ෂණ දෙපාර්තමේන්තුව නීතිපතිවරයාගෙන් උපදෙස් ඉල්ලා ඇති බවයි.
ඒ අනුව මෙම විමර්ශන තවමත් මූලික අදියරේ පවතින බවත්, මෙම පෙත්සම්කරුවන් දෙදෙනා මෙම අවස්ථාවේදී අත්අඩංගුවට ගැනීමේ තීරණයක් ගෙන නොමැති බවත් නියෝජ්ය සොලිසිටර් ජනරාල්වරයා සඳහන් කළේය.
කෙසේ වෙතත් පෙත්සම්කරුවන් දෙදෙනාට එරෙහිව සිදුකෙරෙන විමර්ශනවලදී අත්අඩංගුවට ගැනීමට තරම් ප්රමාණවත් කරුණු අනාවරණය වුවහොත් ඒ පිළිබඳව මෝසමකින් අධිකරණයට දැනුම් දෙන බව ද නියෝජ්ය සොලිසිටර් ජනරාල්වරයා වැඩිදුරටත් අධිකරණයට දැනුම් දුන්නේය.
2019 නොවැම්බර් 16දා පැවති ජනාධිපතිවරණයෙන් ජයග්රහණය කළ ගෝඨාභය රාජපක්ෂ සිය මුල්ම රාජකාරිය ලෙස සිදු කළේ ශානි අබේසේකර අපරාධ පරීක්ෂණ දෙපාර්තමේන්තුවේ අධ්යක්ෂ ධුරයෙන් ඉවත් කොට, ගාල්ල දිසාව බාර නියෝජ්ය පොලිස්පතිවරයාගේ පෞද්ගලික සහකාර ලෙස පත්කර යැවීමයි. ඉන්පසු ඔහුගේ වැඩ තහනම් කෙරිණි.
2020 පාර්ලිමේන්තු මැතිවරණය පැවති අගෝස්තු 05දාට දින කිහිපයකට පෙර, එනම් එම වසරේ ජූලි 31දා ශානි අබේසේකර අත්අඩංගුවට ගනු ලැබුවේ අසත්ය චෝදනාවක් නගමිනි. එය අසත්ය චෝදනාවක් බව පසුව අභියාචනාධිකරණය තීන්දු කළේය.