මේක මේ මන්දාකිනියෙ ජීවත්වෙන බහුතරයක් නියෝජනය කරන්නට සමත් නියැඳියක කතාවක්.
කවරයේ කළුපාටින් පේන ගැහැණු රූපයයත් පාට තුනකින් තියෙන පිරිමි රූපත් මේ කතාවේ සාරාංශය සංකේතවත් කරනවා.
තුන් විදිහක තුන්දෙනෙක්ගෙන් ලවින්දි තමන්ගෙ ජීවිතය පාට කරගන්න උත්සහකලා.
මේ පොතේ එන චරිත වල තීරණාතමක අවස්ථාවලට සෘජුව හෝ වක්‍රව සමාජයේ දේශපාලනමය බලපෑම් ඇතිවෙනවා. ඒ වගේම බැහැර කරනවයි කියලා පෙන්වන සමාජ සම්ප්‍රදායන්ටත් මේ හැම චරිතයක්මත් නතු වෙනවා.
කතුවරයා ඒ ඒ චරිතයට තෝරාගෙන තියෙන භාෂා රටාව එකිනෙකට වෙනස් වෙනවා. ආරම්භයේම කතාව කිවගන්න පුළුවන් සරල සැහැල්ලු බව එන්න එන්නම සංකීර්ණ වෙනවා. උදාහරණයකට දේශපාලන ක්‍රියාකරුවා ගැන ලියැවෙන කොටසෙදි ඒ චරිතයේ තියෙන අවිවේකීබව කලබලකාරීබව වගේම තමාගෙ නම රැකගෙන කතා කරන්න බලන උත්සහය පවා අපිට දැනෙන්න ගන්නවා.
සැමියා හැර පිරිමි තුන් දෙනෙකුගෙනුත් නොලැබුණ තමන් බලාපොරොත්තුවුන සෙනෙහස සම ලිංගික කාන්තාවකගෙන් ලවින්දිට ලැබුනද කියන මානයට කතුවරයා අපිව තල්ලු කරනවා.
වෙන පොත් වල පිටු ගනන් ලියලත් හඟවන්නට බැරි ශෘංගාරයක් එක වාක්‍යකට කැටි කරලා ලියන්න කතුවරයා සමත් වෙනවා.
මේ මන්දාකින්යෙ ඉන්න හැම මනුස්සයෙක්ම තනි වෙන්න බයයි. සමහර වෙලාවට ඒ බයම තමන්ව මරණකරා මෙහෙයවනවා.
කව්රුහරි කෙනෙක් මේ පොතේ ටිකක් කියවලා ඉතිරිය පසුව කියවනවා කියලා හිතවනවානම් මම ඒ අයට අනතුරු අඟවනවන්න කැමතියි. කතාව ගලාගෙන යන ප්‍රවාහයට හසුවුන ඔබට ඉන් ගැලවෙන්න හිතනවත් බැරිවේවි. ඒ ලිවීම් ශෛලිය ඒ තරම්ම රසවත්.