ශ්‍රී ලංකාව වෙනුවෙන් ටෙස්ට් වරම් දිනූ 166 වෙනි ක්‍රීඩකයා වීමේ භාග්‍ය හිමි කර ගැනීමට මිලාන් රත්නායක සමත් විය.
මිලාන් රත්නායක ට මේ අවස්ථාව හිමි වීම තරමක විවාද සම්පන්නය.
ඔහුට මෙම අවස්ථාව හිමි වන්නේ නිමාවූ බංග්ලාදේශ තරගාවලියේ දී ඉතා හොඳින් පන්දු යැවූ ළහිරු කුමාර සහ කසුන් රාජිත ට ඉහළිනි.
නවක ක්‍රීඩකයෙකුට අවස්ථාව ලබා දීම අරමුණ වූවා නම් බොහෝ දෙනෙකුගේ තෝරාගැනීම නිසල තාරක විය හැකිව තිබුණි.
එනමුත් ඔවුන් සියලූම දෙනාට ඉහළින් මිලාන් තෝරා ගැනීමට තේරීම් කමිටුව කටයුතු කර තිබේ.
ඔහුගේ උස, වයස ආදී කාරණා ද ඊට හේතු වන්නට ඇත.
කෙසේ වෙතත් විවාදාත්මක තෝරා ගැනීමට සාධාරණත්වය ඉටු කිරීමේ වගකීම මිලාන් සතුය.
ඔහුගෙන් තේරීම් කමිටුව කුමක් හෝ විශේෂත්වයක් දකින්නට ඇත. එය ඔප්පු කිරීම ඔහුට භාරය.
අඩි හයක් උස මිලාන්, මූවර්ස් ක්‍රීඩා සමාජයට ක්‍රීඩා කරයි. කුරුණෑගල ප්‍රදේශයේ උපන් ඔහු වාරියපොළ ශ්‍රී සුමංගල විද්‍යාලයේ ආදි සිසුවෙකි.
ඉරේෂාන් සිරිවර්ධන(fb)
2024/08/21