මන්නාරම, වෙඩිතලතිවු ප්රදේශයේ සුළං විදුලි බලාගාරයක් ඉදිකිරීමට ඉන්දියාවේ අදානි සමාගම වෙත ලබා දී තිබෙන අමාත්ය මණ්ඩල අනුමැතිය බලරහිත කිරීමේ නියෝගයක් නිකුත් කරන ලෙස ඉල්ලා ගොනුකර තිබෙන මූලික අයිතිවාසිකම් පෙත්සම් පහක් සලකා බැලීම සඳහා ඔක්තෝබර් මස 14දා කැඳවන ලෙස ශ්රේෂ්ඨාධිකරණය අද (02) නියම කළේය.
එස්. තුරෙයිරාජා, ඒ.එච්.එම්.ඩී. නවාස්, ශිරාන් ගුණරත්න සහ අචල වෙංගප්පුලි යන විනිසුරුවරුන්ගෙන් සමන්විත ශ්රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම් කැඳවනු ලැබිණි.
පෙත්සම්වලට අදාළ සීමිත විරෝධතා ඇත්නම් ඒවා අගෝස්තු මස 20දාට පෙර ගොනුකරන ලෙස ද වගඋත්තරකරුවන්ට නියෝග කළ විනිසුරු මඩුල්ල, ඊට අදාළ ප්රතිවිරෝධතා තිබේ නම් ඒවා සැප්තැම්බර් 13දාට පෙර ගොනුකරන ලෙස ද පෙත්සම්කාර පාර්ශ්වවලට නියෝග කළේය.
පරිසර යුක්ති කේන්ද්රය ඇතුළු පාර්ශ්ව 05ක් විසින් මෙම පෙත්සම් ඉදිරිපත් කරමින් යෝජිත සුළං බලාගාරය ඉදිකරනු ලැබුවහොත් ඒ තුළින් පාරසරික ජෛව විවිධත්වයට දැඩි බලපෑමක් එල්ලවන බවත්, බලාගාරයෙන් සංක්රමණික පක්ෂීන්ගේ ජීවිත දැඩි අනතුරට ලක්වීමට ඉඩ තිබෙන බවත් සඳහන් කර තිබිණි.