පොලිස්පතිවරයාගෙන් නොවිමසා පොලිස් දෙපාර්තමේන්තුවේ දෙවැනියා වන ජ්යෙෂ්ඨ නියෝජ්ය පොලිස්පති (පරිපාලන) තනතුරට නිලධාරියකු පත්කිරීමට හැකියාව ඇති බවට නීතිපති දෙපාර්තමේන්තුවෙන් දැනුම්දීමෙන් පසු, එම තනතුරේ වැඩ බැලීම සඳහා ජ්යෙෂ්ඨ නියෝජ්ය පොලිස්පති ලලිත් පතිනායක පත්කිරීමට ජාතික පොලිස් කොමිෂන් සභාව අද (01) තීරණය කර තිබේ.
පොලිස් දෙපාර්තමේන්තුවේ ජ්යෙෂ්ඨතා අනුපිළිවෙල අනුව මේ පත්කිරීම සිදු කළ බව ජාතික පොලිස් කොමිෂන් සභාව නිවේදනය කළේය.
පසුගිය ජූලි 18 දින මේ තනතුරේ සිටි ජ්යෙෂ්ඨ නියෝජ්ය පොලිස්පති නිලන්ත ජයවර්ධන අනිවාර්ය නිවාඩු යැවීමට පොලිස් කොමිසම කටයුතු කළේය. එම කොමිසම පෙන්වා දෙන්නේ මේ තනතුරට නිලධාරියකු නම් කර එවන ලෙස එදින ම පොලිස්පති දේශබන්දු තෙන්නකෝන් වෙත දැනුම් දුන් බවයි. එහෙත් ජූලි 24දා පොලිස්පති දේශබන්දු තෙන්නකෝන්ට පොලිස්පති තනතුරේ බලතල ක්රියාත්මක කිරීම ශ්රේෂ්ඨාධිකරණයෙන් තහනම් කරන ලදි.
ජූලි 29 දින තෙක් පොලිස්පතිවරයාගෙන් හෝ වැඩ බලන පොලිස්පතිවරයකුගෙන් නිර්දේශ නොලැබීම නිසා මේ සම්බන්ධයෙන් කටයුතු කළ යුත්තේ කෙසේද යන්න කොමිසම මගින් නීතිපති දෙපාර්තමේන්තුවෙන් විමසා තිබිණි.
ආණ්ඩුක්රම ව්යවස්ථාවේ 155 (උ)(1)(අ) අනුව මේ තනතුර පිරවීමේදී පොලිස්පතිවරයා විමසා කටයුතු කිරීමට කොමිසම බැඳී සිටී. මේ ගැන විමසීමෙන් පසු නීතිපති දෙපාර්තමේන්තුව දැනුම් දී ඇත්තේ පොලිස්පතිවරයකු නොමැති තත්ත්වයක් යටතේ එවැනි විමසීමක් කිරීමට අවශ්ය නැති බවයි.