මාධ්‍ය ඉදිරිපිට සැකකරුවකුගෙන් ප්‍රකාශ ලබාගැනීම සම්බන්ධයෙන් කොළඹ දකුණ බාර නියෝජ්‍ය පොලිස්පති රංගන මාරපන ඇතුළු නිලධාරීන් සම්බන්ධයෙන් විමර්ශනයක් සිදු කර වාර්තාවක් ලබාදෙන ලෙස ජාතික පොලිස් කොමිෂන් සභාව පොලිස්පතිවරයාට නියෝග කර තිබේ.
සති දෙකක් තුළ මේ වාර්තාව ලබාදෙන ලෙසත්, ඉන්පසු එම නිලධාරීන්ට එරෙහිව විනය පියවර ගන්නා බවත් කොමිසම පොලිස්පතිවරයාට දැනුම් දී තිබේ. පසුගිය 11දා රැස්වූ අවස්ථාවේ කොමිසමේ සාමාජිකයන් මේ තීරණය ගෙන ඇත.
ක්ලබ් වසන්ත ඝාතනය සම්බන්ධයෙන් අත්අඩංගුවට ගත් එම සිද්ධිය සිදුවූ ව්‍යාපාරික ස්ථානයේ හිමිකරුගේ පාපොච්ඡාරණයක් මාධ්‍ය මගින් ප්‍රකාශයට පත්වීම ආන්දෝලනයට තුඩු දුන් කරුණක් විය. ශ්‍රී ලංකා මානව හිමිකම් කොමිෂන් සභාව මගින් සැකකරුවන් මාධ්‍ය මගින් අනාවරණය කිරීමේ ඇති ගැටලු සම්බන්ධයෙන් නිර්දේශ ඇතුළත් වාර්තාවක් පොලිස්පතිවරයා වෙත ද යොමුකර තිබිණි.
එම නිර්දේශවලට අනුව පොලිස්පති නිල කාර්යාලය මගින් සියලුම පොලිස් ස්ථාන ප්‍රධානීන්ට යොමුකර ඇති ලිපියක දැක්වෙන්නේ සැකකරුවන් සහ ඔවුන් පවසන කරුණු ප්‍රසිද්ධ කිරීම එම අපරාධ නඩුවලට අගතිදායක ලෙස බලපාන බවයි. මේ නිසා එවැනි දේ නොකරන ලෙස ද හිටපු පොලිස්පති චන්දන වික්‍රමරත්න විසින් උපදෙස් දී තිබිණි.
එම සියල්ල නොතකා නියෝජ්‍ය පොලිස්පතිවරයා ඇතුළු පිරිස මෙසේ කටයුතු කිරීම පිළිබඳව ශ්‍රී ලංකා මානව හිමිකම් කොමිෂන් සභාවෙන් ද විමර්ශනයක් ආරම්භ කිරීමට නියමිත ය.