රිමාන්ඩ් කරන එක අසාධාරණයි : ඇප නොදෙන්න හේතුවක් නෑ – කොළඹ ප්‍රධාන මහේස්ත්‍රාත් ඩයනාට ඇප නියම කරමින් කියයි !

අධිකරණයට ඉදිරිපත් වූ හිටපු රාජ්‍ය ඇමති ඩයනා ගමගේ ඇප මත මුදාහරින ලෙස කොළඹ ප්‍රධාන මහේස්ත්‍රාත් තිළිණ ගමගේ අද (21) නියෝග කළේය.
ශ්‍රී ලංකා පුරවැසිභාවය නොමැතිව අසත්‍ය තොරතුරු ඉදිරිපත් කර විදේශ ගමන් බලපත්‍ර ලබාගැනීමේ සිද්ධිය සම්බන්ධයෙන් සැකකාරියක ලෙස නම් කර සිටි ඩයනා ගමගේ සිය නීතිඥවරුන් මාර්ගයෙන් අධිකරණයට ඉදිරිපත් වීමෙන් පසු මේ නියෝගය නිකුත් කෙරිණි. අපරාධ පරීක්ෂණ දෙපාර්තමේන්තු නිලධාරීන් මේ මෝසම විභාගයට ගත් අවස්ථාවේ අධිකරණයේ පෙනීනොසිටීම ද විශේෂත්වයකි.
මෙහිදී කොළඹ ප්‍රධාන මහේස්ත්‍රාත් තිළිණ ගමගේ විවෘත අධිකරණයේදී පැවසුවේ අපරාධ පරීක්ෂණ දෙපාර්තමේන්තු නිලධාරීන් අධිකරණයට නොපැමිණීම නිසා ඩයනා ගමගේ රක්ෂිත බන්ධනාගාරගත කිරීම සාධාරණ නොවන බවයි. දණ්ඩ නීති සංග්‍රහය යටතේ ඩයනා ගමගේට එරෙහිව ඇති වරද ඇප දිය හැකි වරදක් බව ද මහේස්ත්‍රාත්වරයා සඳහන් කළේය.
ඊයේ (20) දිනයේ සැකකාරියක කිරීමෙන් පසු අද (21) දිනයේ ස්වේච්ඡාවෙන් අධිකරණයට ඉදිරිපත්වීමත්, මැයි 09දා සිට විදේශ ගමන් තහනමක් පැවතුණද ඊට පෙර හෝ ඇය විදේශගත නොවීමත්, ස්වේච්ඡාවෙන් අධිකරණයට ඉදිරිපත් වීමත් වැනි හේතු නිසා ඩයනා ගමගේට ඇප නොදී සිටීමට හේතුවක් නැති බව ද ප්‍රධාන මහේස්ත්‍රාත්වරයා මෙහිදී වැඩිදුරටත් අවධාරණය කළේය.