එක්වී සිටින මොහොතක මධු සාදයක
රස තැන් ලියද්දී තව දිවි ජේදයක
පැටලී සවන් ජෝතිගෙ ගී නාදයක
වැටුණා යාළුවෙක් හා මම වාදයක
ජෝතිගෙ දහසකුත් නෙක ගී අතර එන
තියෙනව නේද එක එක මාදිලියෙ පැන
හිතුනද දන්නෙ නෑ මෙය කිසිවෙකුට වෙන
බලපං ටිකක් මේ කිව් කාරණය ගැන
ඇහුවත් කොතෙක් මේ ගී අප්පුඩිද ගසා
දැනුනෙම නැනෙ මේවා නම් ගැටලු ලෙසා
විපරම් කළොත් උඹ කිව් දේ නොවෙයි මුසා
ඇත ජෝතිලා ගීයෙන් හෙන ප්රශ්න අසා
මේ වැනි ප්රශ්න ඇති ගී අපි ගියොත් සොයා
මතකෙට නගා ගත හැක වැඩි දුරක් නොයා
මේ ගීතයෙන් අමතා මගෙ පනයි කියා
ඇහුවේ අඬන්නේ ඇයි සුදු මැනිකෙ ඔයා
තිබුණත් නොයෙක් වර මේ ගී කණට ඇසී
පැනයක් ලෙසින් දැනිලා නැත කලෙක කිසී
අහුවේ ජෝතිපාලත් මෙය සිනහසිසී
බඳ ලෙලවලා කොයි යන්නේ ගමනෙ ලැසී
ලෝකයෙ වෙනස්වුණෙ ඇත්තට දෙවියාද
නැත්නම් වෙනස්වුණෙ අපි වගෙ මිනිසාද
අපගේ පිටම පවරා මේ ගැන වාද
ජෝතිල සුරලොවේ දානව ඇති සාද
පටලා සොබාදම හා ආදරය සරූ
ඇහුවේ ප්රශ්න වැලකින් විදියටයි මරූ
ඇයි හිනැහෙන්නෙ පායා නිල් ගුවනෙ තරූ
යනුවෙන් ජෝති ගීතය ආරම්බ කෙරූ
තියෙනව ගීතයක් මිනිහගෙ ගී යායේ
මීටර් වෙන්න එක්කල අහමුද ආයේ
විමසන පැනය මේකයි ඔහු එම ගීයේ
කොතනකදෝ එදා පෙර දින හමුවූයේ
ගී සෑයක්ම මිනිහා කදිමට තැනුවෙන්
අරගමු තවත් ගීයක් එම ගී ගොණුවෙන්
කොහෙදෝ යන්නෙ කවුදෝ දන්නේ යනුවෙන්
ඇහුවේ දුලිකා ගැන ඔහු අප වෙනුවෙන්
මැරිලත් දශක ගණනක් නම ඇත තියලත්
ගී ලොව සූරයෙක් ලෙස කවදත් ජය ලත්
ගැයු ගී ටික ඉතිං ඇත ලෙසටම ගයලත්
ඇහුවා කවුද ඔබ කවුරුන්දෝ කියලත්
මරු අයිඩියා එයි බොනවිට මධුපානේ
මිතුරා කියයි දැන් ගැලවිල්ලක් නැනේ
මේ ගැන තව තවත් විමසන්නම ඕනේ
මේ ගී කාටදැයි ජෝතිම ඇසුවානේ
ගී ගැන වාදයෙදි අපෙ නැත පසුබැස්ම
මේ වගෙ කතා මී විතකට කටගැස්ම
ජෝතිගෙ සිංදු නම් කොයිකවදත් “ඉස්ම”
අහතැකි යනතුරා අපෙ අවසන් හුස්ම