සහකාර පොලිස් අධිකාරි නලින් දිල්රුක් සහ ජ්‍යෙෂ්ඨ පොලිස් අධිකාරි රොෂාන් ඩයස්ට එරෙහිව කොළඹ කොටුව මහේස්ත්‍රාත් අධිකරණයේ පවරා තිබූ පෞද්ගලික නඩුව විභාගයට නොගෙන ප්‍රතික්ෂේප කිරීමට එහි මහේස්ත්‍රාත් තිලිණ ගමගේ අද (25) නියෝග කළේය.
මෙම නඩුව අද පෙරවරු 9.50ට පමණ කැඳවූ අවස්ථාවේ චූදිතයන් ලෙස නම් කළ පොලිස් නිලධාරීන් දෙදෙනා වෙනුවෙන් ජනාධිපති නීතිඥවරයකු ඇතූළු නීතිඥ මඩුල්ලක් ද, නීතිපති දෙපාර්තමේන්තුව නියෝජනය කරමින් රජයේ නීතිඥ ශමින්ද වික්‍රම ද පෙනීසිටියහ.
පැමිණිලිකරු වූ මාධ්‍යවේදී තරිඳු ජයවර්ධන වෙනුවෙන් ජනාධිපති නීතිඥ සාලිය පීරිස්ගේ උපදෙස් මත නීතිඥ තනුක මාධව නන්දසිරි, නීතිඥ පවිත්‍ර මනුජය ද සිල්වා, නීතිඥ ජගත් කුලරත්න, නීතිඥ ඉනේකා හෙන්දාවිතාරණ ඇතුළු නීතිඥවරු පිරිසක් පෙනීසිටියහ.
නීතිපති අවසර නොගැනීම
නඩුවට අදාළ නියෝගයේ අවසාන කොටස අධිකරණයේ දී ප්‍රකාශයට පත් කළ අතර, එමගින් කියවුණේ නීතිපතිවරයාගේ අවසරය නොගැනීම බලවත් නීතිමය දෝෂයක් සේ සලකමින් නඩුව ප්‍රතික්ෂේප කරන බවයි.
මහාධිකරණයට අභියාචනයක්
මෙම නියෝගය ප්‍රතිශෝධනය කරන ලෙස ඉල්ලමින් මහාධිකරණයට අභියාචනයක් කිරීමට සූදානම් බව පැමිණිලි පාර්ශ්වය නියෝජනය කරන නීතිඥවරු පැවසූහ.
නීතිපති හැසිරීම
මෙම නඩුවේ මුල් අවස්ථාවේදී කරුණු සලකා බැලූ අධිකරණය චූදිතයන් ලෙස නම් කළ පොලිස් නිලධාරීන් දෙදෙනාට සිතාසි නිකුත් කිරීමට නියෝග කළේය. ඉන්පසු ව, එනම් නොවැම්බර් 01දා නීතිපති වෙනුවෙන් රජයේ නීතිඥ ශමින්ද වික්‍රම පැමිණිලි පාර්ශ්වයට හෝ ඔහුගේ නීතිඥවරුන්ට දැනුම් නොදී ඒක පාර්ශ්විකව මෝසමක් මගින් නඩුව කැඳවමින් සිතාසි යළි කැඳවන ලෙස කළ ඉල්ලීමක් අනුව සිතාසි යළි කැඳවා තිබිණි.
බරපතළ වරදක්
පසුව නොවැම්බර් 02දා නීතිපතිවරයාට ද දැනුම්දීමක් කරමින් මෝසමක් මගින් නඩුව කැඳවූ පැමිණිලි පාර්ශ්වයේ ජනාධිපති නීතිඥ සාලිය පීරිස් නීතිපති දෙපාර්තමේන්තුවේ හැසිරීම වැරදි බව පෙන්වා දුන් අතර, නොවැම්බර් 08දා යළි සියලුම පාර්ශ්ව කරුණු දැක්වීම සිදු විය.
නඩුව කුමක්ද ?
සහකාර පොලිස් අධිකාරි නලින් දිල්රුක් සහ ජ්‍යෙෂ්ඨ පොලිස් අධිකාරි රොෂාන් ඩයස් විරෝධතාවකදී අයුතු අවහිරයක් කළ බවට, තරුණ ජනමාධ්‍යවේදීන්ගේ සංගමයේ සභාපති ජනමාධ්‍යවේදී තරිඳු ජයවර්ධන විසින් මෙම නඩුව පවරා තිබිණි.
මෙම නඩුවේ සම්පූර්ණ තීන්දුව පිළිබඳ විග්‍රහයක් www.thetime.lk ඔස්සේ බලාපොරොත්තු වන්න !