මත්ද්රව්ය උවදුර පාලනය කිරීම සඳහා ක්රියාත්මක යුක්තිය මෙහෙයුමට අදාළව ජාතික පොලිස් කොමිෂන් සභාව පොලිසියට මාර්ගෝපදේශ මාලාවක් නිකුත් කර තිබේ.
යුක්තිය මෙහෙයුම සම්බන්ධයෙන් ජනමාධ්ය හා සමාජ මාධ්ය තුළ ප්රචාරය වන කරුණු සහ ජනතාව විසින් ජාතික පොලිස් කොමිෂන් සභාව වෙත යොමුකර ඇති මහජන පැමිණිලි පසුගිය 11දා පැවති ජාතික පොලිස් කොමිෂන් සභා රැස්වීමේදී සලකා බැලීමෙන් අනතුරුව මෙම මාර්ගෝපදේශ නිකුත් කිරීමට තීරණය කළ බව ජාතික පොලිස් කොමිෂන් සභාව පෙන්වා දෙයි.
ඒ අනුව ජාතික පොලිස් කොමිෂන් සභාව කරුණු 03ක් යටතේ වැඩබලන පොලිස්පතිවරයා වෙත ලිඛිතව උපදෙස් මාලාවක් නිකුත් කරමින් ඒ පිළිබඳව සියලුම පොලිස් නිලධාරීන් දැනුවත් කරන ලෙස දන්වා තිබේ.
රටේ පවතින නීතිමය රාමුව තුළ නීතියෙන් නියම කරන ලද ආකාරයට කටයුතු කරන ලෙසත්, මූලික මිනිස් අයිතිවාසිකම් උල්ලංඝනය නොවන ලෙස කටයුතු කිරීමට වගබලාගන්නා ලෙසත් එම කොමිෂන් සභාව වැඩබලන පොලිස්පතිවරයා වෙත නිකුත් කරන ලද උපදෙස් මාලාවේ වැඩිදුරටත් සඳහන් ය.
එමෙන්ම නීතියට පටහැනිව කටයුතු කරන බවට සනාථ වන අවස්ථාවලදී එම නිලධාරීන්ට එරෙහිව දැඩි විනය පියවර ගැනීමට සිදු වන බව ද මෙහිදී ජාතික පොලිස් කොමිෂන් සභාව විසින් අවධාරණය කර තිබීම විශේෂත්වයකි.