ජාත්යන්තර මූල්ය අරමුදලේ මීළඟ ණය වාරිකය නියමිත කාලසීමාවේදී නොලැබෙනු ඇති බවට ආර්ථික විශේෂඥයෝ අනාවැකි පළකරති.
පසුගිය 31දා එම අරමුදලේ නියෝජ්ය කළමනාකාර අධ්යක්ෂ කෙන්ජි ඔකමුරා සහ ජනාධිපති රනිල් වික්රමසිංහ අතර මේ සම්බන්ධයෙන් සාකච්ඡාවක් ද පැවැත්විණි. අද (11) සන්ඩේ ටයිම්ස් පුවත්පත වාර්තා කර ඇත්තේ මෙම සාකච්ඡාවේදී ණය වාරිකය ප්රමාද වීම පිළිබඳව සහ ඊට හේතු වන කරුණු පිළිබඳව අවධානය යොමු වූ බවයි.
ජාත්යන්තර මූල්ය අරමුදලේ මගපෙන්වීම් මත සිදුකරන නව මහ බැංකු පනත් කෙටුම්පත සම්මත කිරීමේ ක්රියාවලිය ප්රමාද වීමත්, ණය ප්රතිව්යුහගතකරණ ක්රියාවලිය සීග්රයෙන් සිදුනොවීමත් මීට හේතු ලෙස දක්වා තිබේ. අදාළ පනත් කෙටුම්පත මේ වනවිට පවතින්නේ ශ්රේෂ්ඨාධිකරණයේ ය.
ජාත්යන්තර මූල්ය අරමුදලේ මුල් ණය වාරිකය ලෙස ඇමෙරිකානු ඩොලර් මිලියන 330ක් පසුගිය මාර්තු මාසයේදී මෙරටට ලැබිණි. සැලසුම් කරන ලද ආකාරයට එහි මීළඟ ණය වාරිකය ලබන සැප්තැම්බර් මාසයේදී ලැබිය යුතුය.
ජාත්යන්තර මූල්ය අරමුදලේ නියෝජ්ය කළමනාකාර අධ්යක්ෂවරයා සහ ජනාධිපතිවරයා අතර පැවති සාකච්ඡාවට ජනාධිපති ලේකම් සමන් ඒකනායක, මුදල් රාජ්ය ඇමති ෂෙහාන් සේමසිංහ, ජනාධිපතිවරයාගේ ජාතික ආරක්ෂක උපදේශක සාගල රත්නායක ද සහභාගි වී ඇත.
වෙලාවට හම්බෙයි – මුදල් රාජ්ය ඇමති
මෙම සාකච්ඡාවේදී අවධානය යොමු කළ බව සඳහන් වන ජාත්යන්තර මූල්ය අරමුදලේ මීළඟ ණය වාරිකයේ ප්රමාදය සම්බන්ධයෙන් thetime.lk මුදල් රාජ්ය ඇමති ෂෙහාන් සේමසිංහගෙන් විමසීමක් කළේය.
එහිදී ඇමතිවරයා සඳහන් කළේ එවැනි ප්රමාදයක් සම්බන්ධයෙන් අදාළ සාකච්ඡාවේදී අවධානය යොමු නොකළ බවයි. සැලසුම් කර ඇති ආකාරයට මීළඟ ණය වාරිකය ලංකාවට හිමි වනු ඇතැයි ද විශ්වාසය පළකළ ඇමතිවරයා, ණය ප්රතිව්යුහගතකරණයට අදාළ කටයුතු විධිමත් ව සිදුවෙමින් පවතින බව ද අවධාරණය කළේය.
එසේ නම් ජාත්යන්තර මූල්ය අරමුදලේ නියෝජ්ය කළමනාකාර අධ්යක්ෂවරයා හදිසියේ සහභාගී වූ සාකච්ඡාවට හේතුව කුමක්දැයි අප කළ විමසීමට පිළිතුරු දෙමින් ඇමතිවරයා සඳහන් කළේ සාමාන්යයෙන් එවැනි නිරීක්ෂණ සිදු වන බවත්, එය ජාත්යන්තර මූල්ය අරමුදල සමග සිදුකරන ඉදිරි ආර්ථික ක්රියාවලියට වඩාත් වැදගත් බවත් ය.