ට්විටර් කියන්නේ සමාජ ජාල වෙබ් අඩවියක්. එහිදී පරිශීලකයින්ට කෙටි පණිවිඩ හෝ සටහන් විකාශනය කිරීමට අවස්ථාව උදා වනවා. ට්විට් ලෙස හඳුන්වන මෙම මැසේජස් ටෙක්ස්ට්, වීඩියෝ, ඡායාරූප හෝ වෙනත් සබැඳි පණිවිඩ ලෙස යොමු කළ හැකියි. Twitter හී මූලික අරමුණ වන්නේ මිනිසුන් සම්බන්ධ කිරීම සහ මිනිසුන්ට ඔවුන්ගේ අදහස් විශාල ප්‍රේක්ෂක පිරිසක් සමඟ බෙදා හදා ගැනීමට ඉඩ කඩ ලබා දීමයි. මිලියන 400 ට ආසන්න මාසික පරිශිලකයින් (AMU) ප්‍රමාණයක් මෙම වේදිකාවේ සිටිනවා.
පසුගිය මාසේ 27 දා ලොව ප්‍රකට ව්‍යාපාරිකයෙකු වන ඇලන් මස්ක් මෙම සමාජ ජාලය මිලදී ගත්තා. ඒ ඩොලර් බිලියන 44 ට. හිතන්න 2020 දී අපේ රටේ ජාතික නිෂ්පාදනයේ වටිනාකම වෙන්නේත් ඩොලර් බිලියන 80 ක් විතර. ඇලන් මස්ක් මේක ගත්තත් සමඟමට ප්‍රශ්න ගොඩක් එන්න ගත්තා. ප්‍රධාන හේතුව වුණේ විශාල සේවකයින් ප්‍රමාණයක් ඉවත් කිරීමට ඔහු තීරණය කිරිමයි. ඒ වන විට විවිධ මට්ටමින් වැඩ කරන සේවකයින් 8000 ක් විතර මෙම සමාගමේ සිටියා. ඔවුන්ගෙන් මේ වන විටත් 3700 ක් පමණ ඉවත් කරලා. ඒ වගේම නිවසේ සිට වැඩ කිරීමට තිබූ අවස්ථාවත් ඉවත් කළා. ඇලන් මස්ක් පළමුව මෙම සමාගමේ අධ්‍යක්ෂ මණ්ඩලය විසුරුවා හැරියා. අනතුරුව Twitter හි head of trust and safety ලෙස සේවය කළ Yoel Roth ඉවත් කළා. ඊට පස්සේ chief information security officer වන Lea Kissner ඉවත් වුණා. මේ ආකාරයට සමාගමේ ප්‍රධාන විධායක නිළධාරීන් රැසක් ඉවත් කර හෝ ඉවත් වී තිබෙනවා.
බ්‍රහස්පතින්දා කාර්ය මණ්ඩලය සමඟ ඇලන් මස්ක් ගේ රැස්වීමේදී, ලබන වසරේ ට්විටර් සමාගමට ඩොලර් බිලියන ගණනක් අහිමි විය හැකි බවට අනතුරු අඟවා තිබෙනවා. මේ වන විටත් සමාගම ඩොලර් බිලියන 13 ණයක් සහ ඉදිරි මාස 12 තුළ ඩොලර් බිලියන 1.2 කට ආසන්න පොලී ගෙවීමක් සිදු කිරීමට තිබෙනවා. මේ නිසා ලබන වසරේ සමාගම බංකොලොත් විය හැකි බවට ද ඔහු අණතුරු අඟවා තිබෙනවා. මස්ක් පැවසුවේ සෑම දිනකම සමාගමට ඩොලර් මිලියන 4 ක පාඩුවක් ලබන බවයි. මස්ක් විසින් හඳුන්වා දුන් Twitter Blue ලේබල් වෙරිෆිකේෂන් එකත් මේ වන විට අසාර්ථක වෙලා. එමගින් මාසෙකට ඩොලර් 8 බැගින් සංස්ථාපිත පරිශිලකයින්ගෙන් ඉපැයීමට උත්සාහ කළත් පැමිණි විරෝධය හේතුවෙන් එය තවමත් ක්‍රියාත්මක කර නැහැ.
මේ අතර එක්සත් ජනපද ෆෙඩරල් වෙළඳ කොමිසම (FTC) Twitter හි මේ වර්ධනයන් පිළිබඳව ගැඹුරින් සළකා බලමින් සිටින බව ප්‍රකාශ කළා. පුද්ගලික පරිශීලක තොරතුරු අනිසි ලෙස භාවිතා කරමින් වෙළඳ ප්‍රචාරණය ඉලක්ක කර ගනිමින් පුද්ගලික දත්ත එක්රැස් කිරිමේ චෝදනාව මත මැයි මාසයේදී ට්විටර් සමාගමට ඩොලර් මිලියන 150 ක දඩයක් ද ඇමරිකාවේ මේ FTC විසින් පවනවා තිබෙනවා. බොහෝ සමාජ ජාල පුද්ගලික දත්ත සහ තොරතුරු සිය වෙළඳ අරමුණු වෙනුවෙන් භාවිතා කරනවා. ඒ පිළිබඳව මේ වන විටත් ලොව පුරා විවිධ ගැටළු පැන නැගී තිබෙනවා. කෙසේ වෙතත් ඇලන් මස්ක් ටිවිටර් සමාජ ජාලය විශාල වෙනසකට ලක් කරාවි යැයි මේ වන විටත් මත පළව තිබෙනවා. ඊට හේතුව වී තිබෙන්නේ සමාගමේ මූල්‍ය තත්වය දැන ගෙනම එය මිලදී ගැනීමට ඔහු කටයුතු කිරීමයි.