Apple සමාගමේ ප්රධාන විධායක ටිම් කුක් අද ඉන්දියාවේ මූල්ය අගනුවර වන මුම්බායිහි තම සමාගමේ පළමු වෙළඳසැල දියත් කළේය.
එමෙන්ම දිල්ලි අගනුවර Apple හි දෙවන වෙළඳසැල එළැඹෙන බ්රහස්පතින්දා (20) විවෘත කිරීමට නියමිතව ඇත.
මේ වන විට ඇපල් නිෂ්පාදන ඉන්දියාවේදී අන්තර්ජාලය හරහා හෝ නැවත විකුණුම් ජාල හරහා මිලදී ගත හැකිය.
ටිම් කුක් ඊයේ (17) ට්විටර් පණිවුඩයක් නිකුත් කරමින් කියා සිටියේ ඔහු මුම්බායි හි නව වෙළඳසැලට පැමිණෙන ගනුදෙනුකරුවන් පිළිගැනීමට නොඉවසිල්ලෙන් බලා සිටින බවයි.
මේ අතර අද විවෘත කරන ලද මුම්බායි හි නව අලෙවිසැලේ සේවකයින් ඔල්වරසන් දෙමින් සහ අත්පුඩි ගසමින් සිටියදී කුක් පුද්ගලිකව ගනුදෙනුකරුවන් පිළිගන්නා අයුරු දැකගත හැකි විය.
ඉන්දියාවේ ජංගම දුරකතන වෙළඳපොළ තුළ ඇපල් නිෂ්පාදන සඳහා ඇති ඉල්ලුම ඉතා අවම තත්ත්වයක පවතී.
මෙම නවතම ඇපල් වෙළඳසැල විවෘත කිරීමත් සමග ඇපල් නිෂ්පාදන සඳහා ඇති ඉල්ලුම වැඩි වනු ඇති බවට එම සමාගම විශ්වාස කරයි.