මීන රාසියෙන් මේසෙට කකුළ තියාගන්න
සූරිය දෙවියෝ කලිසම ඇඳගත්තා අන්න
මගෙ සේරම ඇටකටු ටික මහත්තුරු ම ගන්න
හම විතරක් තිබුණ ම ඇති මටත් ගමේ යන්න
ඇට දෙක තුන හතර කියා ගාණක් නෑ ඔන්න
ඉලකූඩුව උරපතු ඇට උගුල්ලලා ගන්න
කොඳුඇට පේලිය ගලවා දෙකට නවා ගන්න
හම විතරක් තිබුණ ම ඇති මට අවුරුදු කන්න.
උකුල් ඇටේ ගැලෙව්වාට තරහක් නෑ ඔන්න
හැබැයි මගේ අහිංසක ම තට්ටම් දෙක දෙන්න
මං ආසයි ඒ දෙක නම් නටව නටව යන්න
හම විතරක් තිබුණ ම ඇති මට අවුරුදු කන්න.
මහත්තුරුනි ඇටකටු ටික සුප් එකකට ගන්න
ඇටමිඳුළුත් මිරිකාගෙන ඉස්ම ටිකත් බොන්න
මට ඒ හැටි බරකුත් නෑ උස්සාගෙන යන්න
හම විතරක් තිබුණ ම ඇති මට අවුරුදු කන්න.
පොඩි උන්ටයි මායියටයි කැවිලි ටිකක් ගන්න
ඇටකටු සේරම අරගෙන කීයක් හරි දෙන්න
හම නැත්තං බිම වැටෙනා සේරම ඔබ ගන්න
හම විතරක් තිබුණ ම ඇති මටත් ගමේ යන්න.