වෘත්තීය සමිති නායකයන් මර්දනය කර ඛනිජ තෙල් සම්පත අහිමි කිරීමේ මහා පාවාදීමේ වටිනාකම බලශක්ති ඇමති කාංචන විජේසේකර ඇමතිවරයා ඇතුළු වගකිවයුත්තන්ට ගෙවීමට සිදුවන බව ශ්‍රී ලංකා පොදුජන පෙරමුණ යටතේ ක්‍රියාත්මක ඛනිජ තෙල්, වාණිජ සේවා, කර්මාන්ත ප්‍රගතිශීලි සේවක සංගමයේ සභාපති බන්දුල සමන් කුමාර thetime.lk වෙත පැවසීය.
ශ්‍රී ලංකා පොදුජන පෙරමුණේ වෘත්තීය සමිතියේ ප්‍රධානියා ලෙස තමන් සහ සංස්ථාවේ තම වෘත්තීය සමිතියේ අනෙකුත් සාමාජිකයන් 2019 ආණ්ඩුව බලයට පත්කිරීම සඳහා කළ කැපකිරීම මහින්ද රාජපක්ෂ ප්‍රමුඛ සියලු පාර්ශ්ව දන්නා බවත්, එසේ තිබියදී මෙසේ තමන් කියන දේට ඇහුම්කන් නොදී සිටීම දැඩි කණගාටුවක් බවත් සභාපතිවරයා සඳහන් කළේය.
පොදුජන පෙරමුණ දේශපාලන පක්ෂය පිහිටුවීමටත් පෙර සිට තමන් ප්‍රමුඛ වෘත්තීය සමිති නායකයන් පොදුජන පෙරමුණු ප්‍රගතිශීලි බලවේගය ගොඩනැගූ බවත්, එහි අරමුණ වූයේ ජාතික සම්පත් සුරක්ෂිත කොට රට දියුණු කිරීම බවත් පෙන්වා දුන් ඔහු, එසේ කළ තමන්ට මෙසේ සැලකීම කිසිසේත්ම අපේක්ෂා නොකළ බව ද අවධාරණය කළේය.
සභාපතිවරයා මෙසේ පැවසුවේ ඛනිජ තෙල් සංස්ථා වෘත්තීය සමිති නායකයන් අනිවාර්ය නිවාඩු යැවීමත්, ඔවුන්ට ආයතන පරිශ්‍රයට ඇතුළු වීම තහනම් කිරීමත් සම්බන්ධයෙන් කළ විමසීමකදී ය.
සත්‍යග්‍රහයේ සිට වර්ජනය දක්වා
සංස්ථාවේ කොටස් විදේශ සමාගම් 03කට වසර 20ක කාලයක් සඳහා පවරා දීම සම්බන්ධයෙන් ඉදිරිපත් කළ කැබිනට් පත්‍රිකාවකට අනුමැතිය ලබාදීමට එරෙහිව සංස්ථ වෘත්තීය සමිති ඊයේ (28) උදෑසන සත්‍යග්‍රහයක් ඇරඹීය. බලධාරීන් ඊට කිසිදු ප්‍රතිචාරයක් නොදැක්වීම නිසා සත්‍යග්‍රහය වර්ජනයක් දක්වා පුළුල් කිරීමට ඊයේ පස්වරුවේ එම වෘත්තීය සමිති තීරණය කළේය.
ඒ අනුව ඉන්ධන බෙදාහැරීම නතර කෙරිණි. ඉන්පසු ආරක්ෂක හමුදා යොදවා බලහත්කාරයෙන් බවුසර්වලට තෙල් පිරවීමටත්, ඒවා පිටත් කිරීමටත් කටයුතු කෙරිණි. එම උත්සාහයේදී තෙල් බවුසර් 10ක් පමණ පිටතට යැවීමට ආරක්ෂක අංශ කටයුතු කළේය.
කෙසේ වෙතත් මේ සඳහා සහයෝගය නොදුන් සහ සංස්ථා සේවකයන්ට රාජකාරියට වාර්තා කිරීමට ඉඩනොදුන් වෘත්තීය සමිති නායකයන්ට එරෙහිව පියවර ගන්නා බව ඊයේ රාත්‍රියේ ඛනිජ තෙල් විෂය බාර ඇමති කාංචන විජේසේකර පැවසීය.
උදෑසන ලිපිය
ඒ අනුව අද (29) උදෑසන ලංකා ඛනිජ තෙල් නීතිගත සංස්ථාවේ සභාපතිවරයාගේ සහ ලංකා ඛනිජ තෙල් තොග ගබඩා පර්යන්ත සමාගමේ සභාපතිවරයාගේ අත්සනින් නිකුත් කළ නිවේදනයක සඳහන් වූයේ ඉන්ධන බෙදාහැරීමේ කටයුතුවලට බාධා වන ලෙස සහ ඉන්ධන බෙදාහැරීමේ සේවාවල යෙදී සිටි සේවකයන්ට බලපෑම් කරමින් එම සේවා අවහිර කිරීමට කටයුතු කළ වෘත්තීය සමිති නායකයන් අනිවාර්ය නිවාඩු යැවීමට සංස්ථා කළමනාකාරිත්වය තීරණය කර ඇති බවයි.
එසේ ම ඔවුන්ට සංස්ථා පරිශ්‍රවලට ඇතුළු වීම තහනම් කරන බව ද එම නිවේදනයේ සඳහන් විය.
‘20ක් අනිවාර්ය නිවාඩු යැව්වා’
මේ සම්බන්ධයෙන් අදහස් දක්වමින් විදුලිබල හා බලශක්ති ඇමති කාංචන විජේසේකර පැවසුවේ අද (29) දින සේවයට වාර්තා නොකළ තෙල් සංස්ථා සේවකයන් 20ක් අනිවාර්ය නිවාඩු යැවීමට කටයුතු කළ බවයි. මෙම සේවකයන්ට ඛනිජ තෙල් නීතිගත සංස්ථා භූමියට ඇතුළු වීම තහනම් කර ඇති බව ද ඔහු පැවසීය.
මේ අතර රට තුළ ඉන්ධන හිඟයක් ඇති වේ යැයි කිසිදු අනියත බියක් ඇති කරනොගන්නා මෙන් ඇමතිවරයා ජනතාවගෙන් ඉල්ලා සිටියේය.
ක්‍රිකට් පොටෝ මානසික මෙහෙයුමක්
වර්ජනය අතර සංස්ථා සේවකයන් ක්‍රිකට් ක්‍රීඩා කරමින් සිටින බවට මාධ්‍ය මගින් පළකළ වීඩියෝවේ සිටින්නේ සංස්ථා සේවකයන් නොවන බවත්, එය සංස්ථා සේවකයන් ජනතාව අතර අප්‍රසාදයට පත්කිරීමට සිදු කළ මෙහෙයුමක් බවත් ඒ පිළිබඳව අප කළ විමසීමකදී වෘත්තීය සමිති නායකයන් කිහිප දෙනෙක් ම තහවුරු කළහ. එවැනි ඡායාරූප රැසක් සමාජ මධ්‍යයේ අද උදෑසන සිට සංසරණය විය.
හේතුව කුමක්ද?
විදේශීය සමාගම් 3කට මෙරට ඉන්ධන සිල්ලර වෙළෙඳපොළ වෙත පිවිසීම සඳහා කැබිනට් අනුමැතිය හිමිවූ බව පෙරේදා (27) විදුලිබල සහ බලශක්ති ඇමති කාංචන විජේසේකර සඳහන් කළේය.
ට්විටර් පණිවුඩයක් නිකුත් කරමින් ඇමතිවරයා පැවසුවේ Hell PLC සමග එක්ව චීනයේ Sinopec, United Petroleum of Australia සහ USA RM Parks යන සමාගම් සඳහා මෙම අනුමැතිය ලැබී ඇති බවයි. ඒ අනුව අදාළ සමාගම්වලට වසර 20ක බලපත්‍රයක් හිමිවීමට නියමිත ය. මෙරටට ඛනිජ තෙල් නිෂ්පාදන ආනයනය කිරීම, ගබඩා කිරීම, බෙදාහැරීම සහ අලෙවි කිරීම යන කාර්යයන් සඳහා ඔවුන්ට මෙම බලපත්‍රය හිමි වේ.
නියෝජිත ඉන්ධන පිරවුම්හල්
ලංකා ඛනිජ තෙල් සංස්ථාවේ මෙහෙයුම යටතේ ක්‍රියාත්මක නියෝජිත ඉන්ධන පිරවුම්හල් 450ක් රට පුරා තිබේ. එම නියෝජිත පිරවුම්හල් 450, අදාළ සමාගම් 3ට 150 බැගින් ලබාදීමට සැලසුම් කර තිබේ.
එදා තීරණය
හිටපු ජනාධිපති චන්ද්‍රිකා බණ්ඩාරනායක ආණ්ඩුව පැවති කාලයේදී ඉදිරිපත් වූ ලංකා ඛනිජ තෙල් සංස්ථා ප්‍රතිව්‍යුහගත කිරීමේ ක්‍රියාවලියට අනුව සංස්ථාව කොටස් 03කට වෙන්කෙරිණි. ඒ අනුව සංස්ථාවේ කොටස්වලින් සියයට 33ක් සංස්ථාවට හිමි විය. ඉන්දියන් ඔයිල් සමාගමට සංස්ථා කොටස්වලින් සියයට 33ක් හිමි විය. ඉතිරි සියයට 33 නියෝජිත මට්ටමේ පැවති අතර, එය ලබාගැනීම සඳහා චීනයේ Sinopec සමාගම ඒ කාලයේදී ද ටෙන්ඩර් ඉදිරිපත් කළේය. එහෙත් එය සිදු වූයේ නැත.
‘පෞද්ගලිකකරණයක් නෙමෙයි’
මෙම කැබිනට් තීරණය සම්බන්ධයෙන් thetime.lk කළ විමසීමේදී ඛනිජ තෙල් ජාතික සේවක සංගමයේ සභාපති සහ සමගි ඒකාබද්ධ වෘත්තීය සමිති සන්ධානයේ කැඳවුම්කරු ආනන්ද පාලිත සඳහන් කළේ මෙය පෞද්ගලිකකරණය කිරීමක් ලෙස හැඳින්විය නොහැකි වුවද, මේ හරහා සිදුකිරීමට උත්සාහ දරන ක්‍රියාවලිය අතිශය බරපතළ බවයි.
ලාභාංශ අහිමි වෙයි
මෙම ඉන්ධන පිරවුම්හල් පෞද්ගලික ඒවා වුවද, ඒවායින් සංස්ථාවට ලැබුණු ලාභාංශ මෙමගින් අහිමි වේ. එසේ ම ඇමතිවරයා සඳහන් කළ ආකාරයට මෙම තීරණය මගින් ඉන්ධන මිල අඩුවීමක් හෝ සංස්ථාවේ සේවක ප්‍රමාණය අඩුවීමක් ද සිදුනොවන බව ආනන්ද පාලිත පෙන්වා දෙයි.
ඉන්දියන් ඔයිල් උදාහරණය
ඔහු වැඩිදුරටත් සඳහන් කරන්නේ ඉන්දියන් ඔයිල් සමාගමට මෙරට ඉන්ධන ව්‍යාපාර සිදුකිරීමට අවස්ථාව ලබාදෙන විට එයින් තරගකාරීත්වයක් ඇතිවන නිසා ජනතාවට වාසි සැලසිය හැකි බව පැවසුණද, එවැන්නක් සිදු නොවූ බවයි. ඉන්පසු ක්‍රමයෙන් ඉන්දියන් ඔයිල් සමාගම මෙරට ඉන්ධන අලෙවිය වර්ධනය කරගත් බවත්, මේ වන විට එම සමාගමට අයත් ඉන්ධන පිරවුම්හල් සංඛ්‍යාව 140 ද ඉක්මවන බවත් ඔහු පැවසීය.
එසේ ම උතුරු – නැගෙනහිර පළාත්වල ප්‍රධාන ඉන්ධන පිරවුම්හල් 35ක් එම සමාගමට ලබාදීමට ද තීරණය කර තිබේ.
අවදානම මෙන්න !
මේ ආකාරයට ම මෙම කැබිනට් තීරණය මගින් ඛනිජ තෙල් සංස්ථාව තවදුරටත් අක්‍රීය වන බවත්, ඉන්පසු සංස්ථාවේ ඉතිරි කොටස් ද සමාගම්වලට ලබාදීමට පසුබිම නිර්මාණය කරගනු ඇති බවත් අප වෙත අදහස් දක්වමින් ප්‍රකට වෘත්තීය සමිති නායකයෙකු වන ආනන්ද පාලිත අවධාරණය කළේය.
‘ඔක්කොම හරි’
මේ අතර අද (29) උදෑසන හයෙන් පසු ගතවූ මුල් පැය 03 තුළ ලංකා ඛනිජ තෙල් සංස්ථාව සතු ඉන්ධන නිකුත් කිරීමේ මධ්‍යස්ථානයෙන් ඉන්ධන බවුසර් 208ක් නිකුත් කර ඇතැයි ඇමති කාංචන විජේසේකර ට්විටර් ගිණුමේ සටහනක් යොදමින් සඳහන් කරයි.
මේ අනුව ඔක්ටේන් 92 ලීටර් 6,600 ධාරිතාවෙන් යුත් බවුසර් 122ක් සහ ලංකා ඔටෝ ඩීසල් ලීටර් 6,600 ධාරිතාවෙන් යුත් බවුසර් 86ක් නිකුත් කර තිබේ.
සාමාන්‍ය පරිදි තෙල් සැපයුම සිදුකරමින් පවතින බව ලංකා ඛනිජ තෙල් නීතිගත සංස්ථාවේ සහ ඛනිජ තෙල් තොග ගබඩා පර්යන්ත සමාගමේ සභාපති මොහොමඩ් උවයිස් මාධ්‍ය වෙත පවසා තිබිණි.