මූල්ය ගැටළු විසඳාගනිමින් පළාත් පාලන මැතිවරණය පැවැත්වීමට ඇති හැකියාව සම්බන්ධයෙන් තීරණයක් ගැනීම සඳහා මැතිවරණ කොමිසම සහ අගමැති දිනේෂ් ගුණවර්ධන අතර මේ සතියේ සාකච්ඡාවක් පැවැත්වීමට නියමිත ය.
අගමැති කාර්යාලයේ ප්රකාශකයෙක් සඳහන් කළේ මැතිවරණ කොමිසම පාර්ශ්වයෙන් එවැනි සාකච්ඡාවක් සඳහා අවස්ථාවක් ඉල්ලා ඇති බවත්, එය මේ සතිය තුළ සිදු වනු ඇති බවත් ය.
මේ අතර දෙවරක් කල්දැමීමට සිදු වූ පළාත් පාලන මැතිවරණය සම්බන්ධයෙන් දේශපාලන පක්ෂ ද මේ සතියේ තීරණාත්මක සාකච්ඡාවක් පැවැත්වීමට කොමිසම තීරණය කර තිබේ.
මැතිවරණ නිරීක්ෂණ සංවිධානයක් වන පැෆ්රල් (People’s Alliance for Free and Fair Elections – PAFFREL) සංවිධානය මගින් ජනාධිපති රනිල් වික්රමසිංහ විසින් මුදල් ඇමතිවරයා ලෙස මැතිවරණයට අවශ්ය මුදල් මුදානොහැරීමට එරෙහිව ශ්රේෂ්ඨාධිකරණයට පෙත්සමක් ඉදිරිපත් කිරීමට ද නියමිත ය. පසුගිය 03දා ශ්රේෂ්ඨාධිකරණ නියෝගයක් මගින් මෙම මුදල් රඳවාගැනීම අත්හිටුවමින් නියෝගයක් ද නිකුත් කෙරිණි.
කැබිනට් මණ්ඩලය මගින් අදාළ මුදල් නිකුත් කිරීම වැලැක්වීම සඳහා රාජ්ය පරිපාලන අමාත්යංශයේ ලේකම්වරයා මගින් මෙන්ම මුදල් අමාත්යංශයේ ලේකම් සහ භාණ්ඩාගාර ලේකම් මහින්ද සිරිවර්ධන මගින් ද අවස්ථා කිහිපයකදී උත්සාහ දරන ලදි. මුදල් අමාත්යංශයේ ලේකම්වරයාට අවසාන වරට කැබිනට් මණ්ඩලය මගින් දැනුම් දෙන ලද්දේ අත්යවශ්ය සේවා සඳහා මුදල් නිකුත් කරන ලෙසත්, එසේ නොවන අවශ්යතා සඳහා මුදල් ඇමතිවරයාගේ අනුමැතිය අවශ්ය බවත් ය.
මැතිවරණ කොමිසම මගින් මුදල් අමාත්යංශයේ ලේකම්වරයාට යොමුකරන ලද මුදල් ඉල්ලීමේ ලිපිය සම්බන්ධයෙන් ද ලේකම්වරයා විසින් ප්රතිචාර දක්වා තිබුණේ ඇමතිවරයාගේ අනුමැතිය මෙතෙක් නොලැබුණු බවටයි.