රාජ්‍ය ආයතනවල ගිණුම් මහජන බැංකුවෙන් ඉවත් කර, වෙනත් බැංකුවලට යොමුකිරීමේ උත්සාහයක් පිළිබඳව පසුගියදා වාර්තා වූ අතර, මෙම පුවත සම්බන්ධයෙන් ලංකා බැංකු සේවක සංගමය විසින් මාධ්‍ය නිවේදනයක් නිකුත් කෙරිණි.
එම සංගමයේ ප්‍රධාන ලේකම් රන්ජන් සේනානායක සඳහන් කරන ආකාරයට එම සංගමයේ සාමාජික රාජ්‍ය හිමිකාරිත්වය යටතේ පවතින බැංකුවක් වන මහජන බැංකුවේ පවතින රාජ්‍ය, සංස්ථා සහ පුද්ගලික ගිණුම් ඉන් ඉවත් කර වෙනත් බැංකුවලට ගෙනයෑමට ආණ්ඩුව උත්සාහ කරන්නේ නම්, එයට තම සංගමය දැඩි ලෙස විරෝධය පළකරන බවයි.
වැඩ වර්ජනය නිසා ද ?
පසුගිය මාර්තු 15දා රට පුරා පැවති වැඩවර්ජනය සඳහා බැංකු සේවක සංගමයේ සාමාජිකත්වය දරන රාජ්‍ය, පුද්ගලික, දේශීය සහ විදේශීය බැංකු 17ක පමණ සේවක-සේවිකාවන් සම්බන්ධ වී ඇත. එසේ සම්බන්ධ වූ එක් සාමාජික බැංකුවක් ඉලක්ක කරගෙන ආණ්ඩුව මෙවැනි පියවරක් ගැනීමට කටයුතු කරන්නේ නම්, එය බරපතළ තත්වයක් බව ද එම සංගමය සඳහන් කරයි.
අදාළ වර්ජනයට මහජන බැංකුවේ සේවක ප්‍රජාව මෙන්ම තම සංගමය නියෝජනය කරන සේවකයන් සම්බන්ධ වූයේ ආණ්ඩුව විසින් වෘත්තිකයන් මත පනවා ඇති අසාධාරණ බදු සංශෝධනය කරගැනීම සහ රටේ බදු ප්‍රතිපත්තිය නිවැරදි කරගැනීම වෙනුවෙන් බවත්, එහි ප්‍රතිඵලයක් ලෙස අවසන් විසඳුමක් ලබාදීමට ජනාධිපති ලේකම් කාර්යාල මට්ටමෙන් ද සාකච්ඡා ඉදිරියට යන බවත් ලංකා බැංකු සේවක සංගමය වැඩිදුරටත් සඳහන් කරයි.
‘අපි අඛණ්ඩව සේවය ලබාදුන්නා’
වැඩවර්ජනය පැවති දිනයේ බැංකු සේවා බිඳවැටීමක් සිදුවූවත්, අනෙකුත් සෑම දිනයකදී ම අඛණ්ඩව සේවා ලබාදීමට සියලුම බැංකු කටයුතු කර තිබේ. එවැනි වටපිටාවක මෙසේ එක් බැංකුවක් ඉලක්ක කරගෙන සිදුකරන්නට යන මෙම ක්‍රියාව ‘වෙනත් කිසියම් පරමාර්ථයක්’ වෙනුවෙන් සිදුකරන බව පෙනීයන්නේ යැයි ද එම මාධ්‍ය නිවේදනයේ සඳහන් ය.
කෙසේ වෙතත් වැඩ වර්ජනය පැවති දිනයේ රාජ්‍ය මාධ්‍ය සහ තවත් පුද්ගලික මාධ්‍ය ආයතන කිහිපයක් ම වාර්තා කළේ මහජන බැංකු ශාඛා 352න්, 330ක් ම ක්‍රියාත්මක වූ බවත්, ලංකා බැංකු ශාඛා 265ම අදාළ දිනයේ අඛණ්ඩව ක්‍රියාත්මක වූ බවත් ය.
විකිණීමේ කුමන්ත්‍රණයක් ?
මේ වන විට රාජ්‍ය බැංකු පුද්ගලීකරණය කිරීම සඳහා නැවතත් සැලසුමක් ක්‍රියාත්මකව තිබෙන වටපිටාවක මෙසේ රාජ්‍ය බැංකුවක ගිණුම් වෙනත් බැංකුවකට මාරුකිරීම එහි එක් පියවරක් විය හැකි බව ද බැංකු සේවක සංගමය පවසයි. එසේ ම රාජ්‍ය බැංකුවල තනතුරු ඩැහැගැනීම සඳහා පාර්ශ්ව කිහිපයක් කුමන්ත්‍රණය කරමින් පසුවන බව ද එහි සඳහන් ය.
අහුවෙන්න එපා !
බැංකු සේවකයන් වැඩ වර්ජනයට සම්බන්ධ වූයේ හුදෙක්ම තමන්ගේ ගැටළු පමණක් නොව රට ම මේ මොහොතේ මුහුණ දෙන ගැටළුවලට විසඳුම් සෙවීමේ අරමුණින් බවත්, එම නිසා වර්ජනයට මුවාවී සිදුකරන මෙවැනි කුමන්ත්‍රණවලට හසුනොවන ලෙසත් එම සංගමය ගනුදෙනුකරුවන්ගෙන් සහ පොදු මහජනතාවගෙන් ඉල්ලා සිටී.