අන්තර් විශ්වවිද්‍යාලයීය ශිෂ්‍ය බල මණ්ඩලය අද (07) දහවල් කොළඹදී පැවැත්වීමට නියමිත උද්ඝෝෂණයට අදාළව කොටුව මහෙස්ත්‍රාත් තිළිණ ගමගේ විසින් අධිකරණ නියෝගයක් නිකුත් කර තිබේ.
කොටුව පොලිසිය විසින් කළ ඉල්ලීමකට අනුව මහේස්ත්‍රාත්වරයා එම නියෝගය නිකුත් කර තිබේ.
ඒ අනුව එම උද්ඝෝෂණයට එක්වන පුද්ගලයින්ට අද පෙරවරු 11 සිට රාත්‍රී 10 දක්වා කාලය තුළ ජනාධිපති මන්දිරය, ජනාධිපති ලේකම් කාර්යාලය, මුදල් අමාත්‍යාංශය සහ ගාලුමුවදොර පිටිය යන පරිශ්‍රයන්ට ඇතුළුවීමෙන් වළකින ලෙස අදාළ නියෝගයේ සඳහන් ය.
එමෙන්ම කොටුව, කොම්පඥ්ඥවීදිය සහ තවත් නම් කරන ලද කොළඹ මාර්ග රැසක් අවහිර කිරීමෙන් වළකින ලෙසද අධිකරණය නියෝගයේ සඳහන්ව ඇත.
එම නියෝගය 16 දෙනෙකු වගඋත්තරකරුවන් කරමින් සහ උද්ඝෝෂණයට සහභාගි වන තැනැත්තන්ට අදාළ බව පොලිස් මාධ්‍ය ප්‍රකාශක කාර්යාලය විසින් නිකුත් කළ මාධ්‍ය නිවේදනයේ සඳහන්ව වේ.
ඉල්ලීම් 7ක් මුල් කරගනිමින් විශ්වවිද්‍යාල සිසුන් උද්ඝෝෂණය සංවිධානය කර ඇති අතර ඊට දිවයින පුරා පිහිටි විශ්වවිද්‍යාල ශිෂ්‍යයන් අද කොළඹට පැමිණීමට නියමිතය.