ජාත්‍යන්තර මූල්‍ය අරමුදලේ මූල්‍ය පහසුකම නියමිත කාල සීමාවේදී නොලැබුණද, පවතින තත්ත්වය යටතේ රටට ඉදිරියට යෑමේ හැකියාව පවතින බව මහ බැංකු අධිපති නන්දලාල් වීරසිංහ පවසයි.
එසේ ම ජාත්‍යන්තර මූල්‍ය අරමුදලේ වැඩසටහනට අදාළ ව ලංකාව විසින් සිදු කළ යුතු සියලු කටයුතු මේ වන විට අවසන් කර ඇතැයි ද ඔහු සඳහන් කරයි. මහ බැංකු ශ්‍රවණාගාරයේ පවත් මාධ්‍ය හමුවකදී අදහස් දක්වමින් ඔහු වැඩිදුරටත් පැවසුවේ සාර්ථකව ඉදිරියට යෑමේ අවස්ථාව ඉක්මනින් ම ලැබෙනු ඇති බවත්, එවිට රැට සාමාන්‍ය තත්ත්වයට පත්වනු ඇති බවත් ය.
ආණ්ඩුව විසින් ගනු ලැබූ කඩිනම් ක්‍රියාමාර්ග වන විනිමය අනුපාත, සංචිත වැඩි කරගැනීම, උද්ධමනය පාලනය, වෙළෙඳපොල පොළී අනුපාතය අඩුකිරීම සහ වෙනත් ක්‍රියාමාර්ග හරහා රජයේ ආදායම වැඩිකර ගැනීම නිසා යහපත් ප්‍රවණතා ඇතිවෙමින් තිබෙන බව ද ඔහු අවධාරණය කරයි.
මේ අතර ශ්‍රී ලංකා රජය බැංකු පොළී අනුපාත යළි ඉහළ දැමීම මේ අවස්ථාවේ ගතයුතු ව තිබූ නිවැරදි ක්‍රියාමාර්ගයක් බව ජාත්‍යන්තර මූල්‍ය අරමුදල සඳහන් කරයි. එම අරමුදල පෙන්වා දෙන්නේ මෙරට උද්ධමනය පාලනය සඳහා ගෙන යන වැඩසටහනට එය මහත් රුකුලක් වනු ඇති බවයි.
ශ්‍රී ලංකා රජය උද්ධමනය පාලනය කිරීම සඳහා ගෙන යන සමස්ත ක්‍රියාවලිය ද ජාත්‍යන්තර මූල්‍ය අරමුදලේ පැසසුමට ලක්ව තිබේ.
ජාත්‍යන්තර මූල්‍ය අරමුදලේ කළමනාකරණ අධ්‍යක්ෂ ක්‍රිස්ටලිනා ජෝර්ජිවා සහ ජනාධිපති රනිල් වික්‍රමසිංහ අතර සූම් ඔස්සේ විශේෂ සාකච්ඡාවක් ද පැවති බව මාධ්‍ය වාර්තා කළේය. එහිදී ශ්‍රී ලංකාව අපේක්ෂා කරන ජාත්‍යන්තර මූල්‍ය අරමුදලේ මූල්‍ය පහසුකම සහ ණය ප්‍රතිව්‍යුහගත කිරීම සම්බන්ධයෙන් දීර්ඝ ලෙස සාකච්ඡාවට ලක්ව ඇති බව සඳහන් ය.
මේ වන විට ශ්‍රී ලංකාවේ ණය ප්‍රතිව්‍යුහගත කිරීම සහ මූල්‍ය පහසුකම සම්බන්ධයෙන් ධනාත්මක සහ සුබවාදී පසුබිමක් ඊට අදාළ සියලු පාර්ශ්ව වෙතින් නිර්මාණය වෙමින් පවතින බව ජනාධිපති මාධ්‍ය අංශය නිකුත් කළ නිවේදනයක ද සඳහන් විය.