මැතිවරණ කොමිෂන් සභාව ඇතුළු ස්වාධින කොමිෂන් සභා සඳහා නව සාමාජිකයන් පත්කිරීමේ කටයුතු මේ මාසය තුළ අවසන් කිරීමට තීරණය කර ඇති බව ව්‍යවස්ථාදායක සභා ආරංචි මාර්ග සඳහන් කරයි.
කතානායක මහින්ද යාපා අබේවර්ධනගේ ප්‍රධානත්වයෙන් යුත් ව්‍යවස්ථාදායක සභාව මෙම කොමිෂන් සභා අයදුම්පත් කැඳවනු ලැබිණි. එම අයදුම්පත් අතරින් සුදුස්සන් තෝරාගැනීම සහ ඔවුන්ගේ සුදුසුකම් පරික්ෂ කිරීම පිළිබඳ කටයුතු සැලසුම් කිරීම මේ දිනවල සිදුකරන බව ව්‍යවස්ථාදායක සභාවේ සාමාජිකයෙක් thetime.lk වෙත පැවසීය.
ස්වාධීන කොමිෂන් සභා සාමාජිකයන් පත්කිරීම සඳහා අයදුම්පත් කැඳවීමේ පුවත්පත් නිවේදන පෙබරවාරි 01දා පළකළ අතර, ඒ සඳහා වන අවසාන දිනය ලෙස දැක්වුණේ පෙබරවාරි 15 ය. මීට අදාළ අයදුම්පත් ආකෘතිය පාර්ලිමේන්තු නිල වෙබ් අඩවියේ පළකෙරිණි.
කතානායකවරයා සමග අගමැති දිනේෂ් ගුණවර්ධන, විපක්ෂ නායක සජිත් ප්‍රේමදාස, ඇමති නිමල් සිරිපාල ද සිල්වා, පාර්ලිමේන්තු මන්ත්‍රී සාගර කාරියවසම් මෙන්ම මන්ත්‍රීවරු නොවන සාමාජිකයෝ ලෙස ආචාර්ය ප්‍රතාප් රාමනුජම්, වෛද්‍ය දිල්කුෂි අනුලා විජේසුන්දර සහ ආචාර්ය දිනේෂා සමරරත්න ව්‍යවස්ථාදායක සභාව නියෝජනය කරති.