මේ සෙරෙප්පු දමාගෙන
ගැබ්බර බිරිය බලන්නට
ඉස්පිරිතාලෙ යන්නැති
පොඩි දුවක් හිතින් වඩාගෙන
ආපහු ගෙදර එන්නැති
මේ සෙරෙප්පු දාගෙන
එළවළු ගේන්න
ඉරිද පොළට යන්නැති
පොඩි උන් උස් මහත් වන හීනයක්
මේ සෙරෙප්පු උඩ තියෙන්නැති
මේ සෙරෙප්පු දමාගෙන
ෆුට්බෝඩ්වල එල්ලිල යන්නැති
බේත් පෝලිම්වල ඉන්නැති
අත්වලින් ගලපු ඩාදියත්
ඇස්වලින් ගලපු කඳුළුත්
මේ සෙරෙප්පු සිප ගන්නැති
මේ සෙරෙප්පු දාගෙන
අලුත් හීනයක් දැක දැක
ඊයෙ ගෙදරින් එන්නැති
අලුත් ලෝකයක්
මේ සෙරෙප්පු උඩ තියාගෙන
ආපහු යන්න හිතාගෙන එන්නැති
ඒ එක හීනයක්
තාම ගෙදර ගිහින් නැතුවැති
මේ සෙරෙප්පු දාගෙන
ඒ හීනෙ ආපහු එනකන්
ගොඩක් උන් බලන් ඇති