නැවත දැනුම් දෙන තුරු මැතිවරණ රාජකාරි අත්හිටුවන ලෙස දැනුම්දෙමින් මැතිවරණ කොමසාරිස් ජනරාල් සමන් ශ්‍රී රත්නායක විසින් දිස්ත්‍රික් තේරීම්භාර නිලධාරීන් වෙත ලිපියක් නිකුත් කර තිබේ.
ඒ අනුව, මැතිවරණ රාජකාරි වෙනුවෙන් කළ අතිකාල දීමනා ගෙවීම් අත්හිටුවා ඇති අතර, රාජකාරි වේලාව සාමාන්‍ය පරිදි ක්‍රියාත්මක වේ.
මැතිවරණ කටයුතු වෙනුවෙන් යොදාගත් අනියම් සහ විශ්‍රාම සේවකයන්ගේ සේවය තාවකාලික ව අවසන් කර ඇති අතර, සේවයේ යොදවා ගත් වෙනත් දෙපාර්තමේන්තුවල සේවකයන් ද නැවතත් ස්ථීර සේවා ස්ථානවලට මුදාහැර ඇත.
එසේ ම මැතිවරණ ආරවුල් කළමනාකරණයට අදාළ ඒකක විසුරුවා හැර ඇති අතර, අමතර පෞද්ගලික ආරක්ෂක නිලධාරීන්ගේ සේවය ද අවසන් කර ඇත. නැවත දැනුම් දෙන තුරු මැතිවරණයට අදාළ අතිකාල නිවාඩු දින වැඩුප් සහ සුබසාධන ගිණුම් කටයුතු ද අත්හිටුවා ඇති බව එම ලිපියේ දැක්වේ.
ඊයේ (17) නිකුත් කර ඇති මෙම ලිපිය, මැතිවරණ කොමිසමේ ලේකම්වරයාට සහ එම කාර්යාලයේ සියලුම මාණ්ඩලික නිලධාරීන්ට පිටපත් කර තිබේ.
