හිටපු ඇමති ජොන්ස්ටන් ප්‍රනාන්දුගේ සමීපතමයෙකු ලෙස හඳුන්වන තුෂාර සංජීව විතාරණ කුරුණෑගල මහා නගර සභාවේ නගරාධිපති ධුරයෙන් ඉවත් කිරීමට වයඹ පළාත් ආණ්ඩුකාර වසන්ත කරන්නාගොඩ කටයුතු කර තිබේ.
ඊයේ (21) දිනැති අංක 2315/66 දරන අති විශේෂ ගැසට් නිවේදනය මගින් මෙසේ නගරාධිපතිවරයා ඉවත් කර ඇත. ඒ අනුව පසුගිය දෙසැම්බර් 31දා සිට එම ධුරය පුරප්පාඩු වූ සේ සැලකිය යුතු බව ද එම ගැසට් නිවේදනයේ සඳහන් ය. ඊට අදාළ හේතු එහි මෙසේ දැක්වේ.
‘වයඹ පළාතට අයත් කුරුණෑගල මහා නගර සභාවේ නගරාධිපතිවරයා විසින් 2023 වර්ෂයට අදාළ ව ඉදිරිපත් කරන ලද අයවැය ලේඛනය 2012 අංක 21 දරන පළාත් පාලන ආයතන (විශේෂ විධිවිධාන) පනතේ 7 වැනි වගන්තිය මගින් සංශෝධිත 252 වැනි අධිකාරය වූ මහ නගර සභා ආඥා පනතේ 215(අ) වගන්තිය ප්‍රකාර ව සභාවේ සම්මත කරනු නොලැබීම හා / හෝ වයඹ පළාත් ගරු ආණ්ඩුකාරවරයා වන ම විසින් ශ්‍රී ලංකා ප්‍රජාතාන්ත්‍රික සමාජවාදී ජනරජයේ අංක 2199/15 දරන සහ 2020.10.29 දිනැති වූ ඇති විශේෂ ගැසට් පත්‍රය මගින් ප්‍රකාශයට පත්කරන ලද 2020 මහා නගර සභා අයවැය සම්පාදනය හා බලාත්මක කිරීමේ නියෝග ප්‍රකාර ව අයවැය සම්පාදනය හා බලාත්මක කිරීමට කටයුතු නොකිරීම හේතුවෙන් 2022.12.31 දින සිට කුරුණෑගල මහ නගර සභාවේ නගරාධිපතිවරයා වන තුෂාර සංජීව විතාරණ යන අය ස්වකීය ධුරයෙන් ඉල්ලා අස්වූවා සේ සලකනු ලැබිය යුතු අතර, ඒ දින සිට බලපැවැත්වෙන පරිදි කුරුණෑගල මහ නගර සභාවේ නගරාධිපති ධුරය පුරප්පාඩු වූවා සේ සැලකිය යුතු බව මෙයින් නියම කරමි.’
අභියාචනාධිකරණ තීන්දුව
මීට අදාළ නැතත්, මීට පෙර නගරාධිපතිවරයාට එරෙහිව කුරුණෑගල මහාධිකරණයේ විභාග වූ ධුරය අවභාවිතය පිළිබඳ HCW/17/2022 නඩුවේ තීන්දුව සම්බන්ධයෙන් ඔහු විසින් ගොනුකරන ලද නඩුවක් අභියාචනාධිකරණයේ විභාග විය. ඒ, CPA/160/2022 අංකය යටතේ ය. එහි පළමු වගඋත්තරකරු ලෙස නම් කර තිබුණේ වසන්ත කරන්නාගොඩ ය.
එම නඩුවේ තීන්දුව පසුගිය ජනවාරි 10දා ලබාදුන් අතර, එමගින් නඩුව ප්‍රතික්ෂේප කෙරිණි. ඉන්පසු වසන්ත කරන්නාගොඩ විසින් ඔහු ව ධුරයෙන් ඉවත් කිරීමේ තීන්දුව ගැනීම ද විශේෂ වේ.
කුරුණෑගල නගරාධිපති ධුරයේ බලය අවභාවිත කරමින් කටයුතු කළ අවස්ථා රැසක් සම්බන්ධයෙන් තුෂාර සංජීව විතාරණට එරෙහි චෝදනා රැසක් පවතී. පුරාවිද්‍යා වටිනාකමක් සහිත කුරුණෑගල රාජසභා මණ්ඩපය විනාශ කිරීම ඒ අතරින් ප්‍රධාන වන අතර, එහිදී නීතිය ක්‍රියාත්මක වීම වළක්වන ලද්දේ හිටපු ඇමති ජොන්ස්ටන් ප්‍රනාන්දු විසින් බව මාධ්‍ය මගින් වාර්තා කෙරිණි.
