ශ්‍රී ලංකාවේ ණය කළමනාකරණය සම්බන්ධයෙන් සාකච්ඡා කිරීමට චීනයේ සහ ඉන්දියාවේ ඉහළ ම පෙළේ රාජ්‍ය තාන්ත්‍රිකයන් පිරිසක් මේ සතියේ ලංකාවට පැමිණීමට නියමිත ය.
චීන කොමියුනිස්ට් පක්ෂයේ ජාත්‍යන්තර දෙපාර්තමේන්තුවේ උප ඇමති චෙන් ෂූ (Chen Zhou) ඇතුළු ඉහළ පෙළේ දූත පිරිසක් අද (14) සිට 18 දක්වා මෙඅරට සංචාරයක නිරත වේ. ඉන්දීය විදේශ කටයුතු ඇමති එස්. ජායිශංකර් (S. Jaishankar) ඇතුළු පිරිසක් ද ලබන 19 – 20 දින දෙකේදී මෙරටට පැමිණීමට නියමිත ය.
ශ්‍රී ලංකා විදේශ කටයුතු අමාත්‍යංශයේ ඉහළ නිලධාරියෙක් පැවසුවේ ජනාධිපතිවරයා ප්‍රමුඛ සියලු පාර්ශ්ව සමග මේ දෙරට නියෝජිතයෝ සාකච්ඡා පවත්වන බවත්, එහිදී ජාත්‍යන්තර මූල්‍ය අරමුදලේ මූල්‍ය සහන සම්බන්ධයෙන් මෙන්ම දෙරටින් ලබාගෙන තිබෙන ණය ගෙවීමේ සහන පහසුකම් ලබාගැනීම සම්බන්ධයෙන් ද අවධානය යොමුකෙරෙනු ඇති බවයි.
රනිල් වික්‍රමසිංහ ජනාධිපති ධුරයට පත්වීමෙන් පසු මෙසේ ඉහළ පෙළේ රාජ්‍ය තාන්ත්‍රිකයන් පිරිසක් මෙරටට පැමිණෙන්නේ මුල් වරට ය.
පසුගිය දෙසැම්බර් 08දා එරට පාර්ලිමේන්තුවේදී අදහස් දක්වමින් ඉන්දීය විදේශ කටයුතු ඇමති එස්. ජායිශංකර් සඳහන් කර තිබුණේ ශ්‍රී ලංකාව දරුණුතම ආර්ථික අර්බුදයක සිටින අවස්ථාවක ඊට සහයෝගය දැක්වීමට හැකිවීම පිළිබඳ තමන් සතුටු වන බවත්, මේ මොහොතේ එසේ සිදුනොකළේ නම් රජය සිය වගකීම පැහැර හැරියා සේ වන බවත් ය.
විශේෂයෙන්ම ශ්‍රී ලංකාවේ දෙමළ ප්‍රජාවට යම් අසාධාරණයක් සිදුවනවා නම් ඊට මැදිහත් වන බවද, නමුත් අර්බුදකාරී අවස්ථාවේදී ජන වර්ගයක් පදනම් නොකරගෙන සමස්ත ජනතාවට රජය සිය සහයෝගය ලබාදීමට කටයුතු කිරීම ඉතා අගයකරන බව ද ඔහු එහිදී පෙන්වා දී තිබිණි.
මේ අතර චීන කොමියුනිස්ට් පක්ෂයේ 20 වැනි ජාතික කොංග්‍රසයෙන් පසු එරට ඉහළ පෙළේ දූත පිරිසක් විදේශ රටක සංචාරය කරන ප්‍රථම අවස්ථාව ද මෙය වේ.
පසුගිය 12දා බීබීසී ප්‍රවෘත්ති සේවය වෙත අදහස් දක්වමින් ලංකාවේ ඇමෙරිකානු තානාපති ජූලි චන්ග් (Julie Chung) පවසා තිබුණේ මෙරට ආර්ථික අර්බුදය විසඳීම සඳහා චීනය කඩිනමින් ප්‍රතිචාර දැක්විය යුතු බවයි. අර්බුදය ඔඩුදුවන තුරු සිටීම චීනයේ වගකීම නොවන බව ද තානාපතිවරිය සඳහන් කර තිබිණි.