රාජ්‍ය පරිපාලන අමාත්‍යාංශයේ ලේකම් නීල් බණ්ඩාර හපුහින්න මැතිවරණ කොමිසම හමුවට අද (13) කැඳවා තිබිණි.
ඒ, පළාත් පාලන මැතිවරණයේ ඇප මුදල් බාරනොගන්නා ලෙස කැබිනට් මණ්ඩල තීරණයක් බව සඳහන් කරමින් දිස්ත්‍රික් ලේකම්වරුන්ට නිකුත් කරන ලද ලිපිය පිළිබඳව කරුණු විමසීම සඳහා ය. කැබිනට් තීරණයකට අනුව පළාත් පාලන ආයතන ඡන්ද විමසීමට අදාළ ව අපේක්ෂක ඇප මුදල් බාරගැනීමෙන් වළකින්නැයි සියලුම දිස්ත්‍රික් ලේකම්වරුන්ට දැනුම්දෙමින් ලේකම්වරයා විසින් ලිපියක් නිකුත් කර තිබුණේ පසුගිය 10දා ය.
පැය කිහිපයක් ඇතුළත තමන් කළ මෙම නියෝගය ආපසු කැඳවීමට රාජ්‍ය පරිපාලන අමාත්‍යාංශයේ ලේකම්වරයා පියවර ගත් අතර, ඔහු පැවසුවේ අදාළ නියෝගයේ පවතින තාක්ෂණික දෝෂයක් හේතුවෙන් එය ආපසු කැඳවූ බවයි.
කෙසේ වෙතත් අද (13) මැතිවරණ කොමිසම හමුවට පැමිණි නීල් බණ්ඩාර හපුහින්න අදාළ ලිපිය සම්බන්ධයෙන් මැතිවරණ කොමිසමෙන් සමාව ඉල්ලා ඇත.
මේ අතර මෙම ලිපිය මගින් ආණ්ඩුක්‍රම ව්‍යවස්ථාව උල්ලංඝනය කර ඇති බව ව්‍යවස්ථා විශාරදයෝ thetime.lk අවධාරණය කළහ.
ව්‍යවස්ථා විශාරදයන් පෙන්වාදුන්නේ ආණ්ඩුක්‍රම ව්‍යවස්ථාවේ 19 වැනි සංශෝධනය මගින් එක්කළ 104 (උ) යටතේ අමාත්‍යංශ ලේකම්වරයා බරපතළ වරදක් කර ඇති බවයි.
එම වගන්තියේ මෙසේ සඳහන් වේ.
104(උ) : යම් ඡන්ද විමසීමකදී හෝ ජනමත විචාරණයකදී කාර්යය සහ කර්තව්‍ය ඉටුකරන සියලුම රජයේ නිලධරයන් විසින්, ඒ කාර්යය සහ කර්තව්‍ය ඉටුකිරීමේදී කොමිෂන් සභාව විසින් නිකුත් කරනු ලබන විධානවලට යටත් ව ක්‍රියා කළ යුතු අතර, ඒ සම්බන්ධයෙන් කොමිෂන් සභාවට වගකිවයුතු සහ උත්තර දිය යුතු වන්නේය.
එසේ ම මෙම විධිවිධානවලට අනුකූල නොවීම වරදක් වන බව ද ව්‍යවස්ථාවේ සඳහන් ය.
104(උ උ) : කිසිදු සාධාරණ හේතුවක් නොමැතිව;
(අ)යම් ඡන්ද විමසීමක් පැවැත්වීමට හෝ ජනමත විචාරණයක් පැවැත්වීමට අදාළ යම් නීතියක් බලාත්මක කිරීම සහතික කිරීම පිණිස කොමිෂන් සභාව සමග සහයෝගයෙන් කටයුතු කිරීම ප්‍රතික්ෂේප කරන හෝ අපොහොසත් වන හෝ ;
මේ අතර ආණ්ඩුක්‍රම ව්‍යවස්ථාවේ ප්‍රතිපාදන අනුව පිහිටුවා ඇති ස්වාධීන මැතිවරණ කොමිෂන් සභාවට අදාළ පනත, රාජ්‍ය පරිපාලන අමාත්‍යංශයේ ලේකම්වරයා විසින් බරපතළ ලෙස උල්ලංඝනය කිරීම අනාගතය සඳහා වන නරක පූර්වාදර්ශයක් වන බවත්, එම නිසා මේ ක්‍රියාවට එරෙහිව නීතිමය පියවර ගැනීම අත්‍යවශ්‍ය බවත් ව්‍යවස්ථා විශාරදයෝ වැඩිදුරටත් අවධාරණය කළහ.
එසේ ම ලේකම්වරයාගේ ලිපියට අනුව ජනාධිපතිවරයා ප්‍රමුඛ ඇමති මණ්ඩලය ද ආණ්ඩුක්‍රම ව්‍යවස්ථාව උල්ලංඝනය කර තිබේ.
අමාත්‍යංශ ලේකම්වරයා විසින් දිස්ත්‍රික් ලේකම්වරුන්ට යවන ලද ලිපියේ ඒ පිළිබඳ මෙසේ සඳහන් විය.
‘2023.01.09 රැස්වූ අමාත්‍ය මණ්ඩලය විසින් නැවත දැනුම් දෙන තුරු පළාත් පාලන ආයතන ඡන්ද විමසීම 2023 සඳහා වන අපේක්ෂක ඇප තැන්පත් මුදල් බාරගැනීමෙන් වළකින ලෙස සියලුම දිස්ත්‍රික් ලේකම්වරුන් වෙත නියෝග කරන ලෙස මා වෙත දන්වා ඇත.’