නොහිතනා මොහොතක දී හිත රිදුණ රිදවීම්
නොකියනා කුණුහරුප යට උනන පිනවීම්
නොදැනෙනා ලෙස හොරෙන් උහුලනා ඉහිලීම්
නොපෙනෙනා තරමට ම සුන්දරය විඳවීම්
ගැලරියට නෑසෙනා බැල්කනියෙ කෙඳිරීම්
බැල්කනිය නොදකිනා ගැලරියේ පිබිදීම්
ගැලරියේ වාඩිවී බැල්කනිය නැරඹීම්
ලැවරියා තලුමරන අශ්ලීල හැසිරීම්
පටු ඉඟට පුළුලුකුල මටසිලිටි තෙරපීම්
දෙටු කණිටු තිසර තන වටකුරුව ගැලපීම්
කොටු පනින කල රිදෙන ඇටමිඳුළු ඉවසීම්
හොටු පනින ප්රීතියකි සටකපට සැනසීම්
තර උදර බිකිනි මස බරසාර මිරිකීම්
හිර ඩෙනිම සුදු වටොර බඳ පටක නෙරපීම්
සුරලොවට සෙම ගලන පැණි කොමඩු තෙරපීම්
පරදාර අහඹුවක මනලෝල හැසිරීම්
දිවාචර නිශාචර කලාබර පැටලීම්
උපාසක බළල් පොර සරාගික වැටලීම්
සහේතුක සුලෝහිත පයෝධර මිරිකීම්
අරාජික සුරාවකි මනෝහර පිපිරීම්
සුකුමාල හාදුවකි සැඟවෙනා කැළැතීම්
මනමාල යාගයකි උතුරනා තෙරපීම්
මධුලෝල සාදයකි නොකියනා කැළැතීම්
සබකෝල ප්රීතියකි පුපුරණා හැසිරීම්
වවුලෙකුගෙ හකු දෙකට පුහුලමක ඇඟවීම්
මයිනෙකුගෙ කුහුලකින් අළු පුහුල් නැරඹීම්
සෙයිලමේ පෝලිමක කළු දොදොල් මිරිකීම්
කොයි තරම් සුන්දර ද අශෝබන හැසිරීම්
නොහිතනා මොහොතක දී හිත රිදුණ රිදවීම්
නොකියනා කුණුහරුප යට උනන පිනවීම්
නොදැනෙනා ලෙස හොරෙන් උහුලනා ඉහිලීම්
නොපෙනෙනා තරමට ම සුන්දරය විඳවීම්