ඇමැති වසන්ත සමරසිංහ, නියෝජ්‍ය ඇමැති මහින්ද ජයසිංහ සහ කඩුවෙල මහ නගර සභාවේ නගරාධිපති රංජන් ජයලාල් සැකකරුවන් ලෙස නම් කර අධිකරණයට ඉදිරිපත් කිරීමට නියෝගයක් නිකුත් කරන ලෙස පැමිණිලි පාර්ශ්වයෙන් කළ ඉල්ලීම ප්‍රතික්ෂේප කරන බව ගල්කිස්ස මහේස්ත්‍රාත්වරයා අද (26) නියෝග කළේය.
පැමිණිල්ලේ ඉල්ලීමක් සම්බන්ධයෙන් තමන්ගේ නියෝගය ප්‍රකාශයට පත්කරමින් ගල්කිස්ස මහේස්ත්‍රාත් පසන් අමරසිංහ මහතා මෙම නියෝගය නිකුත් කළේය.
මේ වන විට ප්‍රශ්නගත දේපළ සම්බන්ධයෙන් කොළඹ වංචා විමර්ශන අංශයෙන් විමර්ශනයක් සිදු කෙරෙමින් පවතින බවත්, එම විමර්ශනයට අදාළ උධෘත නීතිපතිවරයා වෙත යවා මෙම නඩුවට අදාළව උපදෙස් ලබාගැනීමට පියවර ගෙන ඇති බවත් මහේස්ත්‍රාත්වරයා නියෝගයේ සඳහන් කර ඇත.
පසුගිය 24 වැනිදා පාර්ලිමේන්තුවේදී විපක්ෂයේ මන්ත්‍රීවරුන් වන දයාසිරි ජයසේකර, මුජිබර් රහුමාන් ඇතුළු පිරිසක් චෝදනා කර තිබුණේ ඉහත දේශපාලනඥයන් අත්අඩංගුවට ගැනීමට නියෝගයක් දුන් මහේස්ත්‍රාත්වරියක මාරු කර යැවීමට කටයුතු කර ඇති බවයි.
කෙසේවෙතත් අත්අඩංගුවට ගැනීමේ නියෝගයක් ලබා දී නොමැති බවත් මෙම නඩුවේ සැකකරුවන් ලෙස හෝ එම අමාත්‍යවරුන් නම් කර නොමැති බවත් අධිකරණයේදි හෙළි විය. එවැනි අවස්ථාවක විමර්ශන අතරතුර නීතිපතිවරයාගෙන් උපදෙස් ලබාගැනීම නතර කිරීමට හෝ එය අභිබවා නියෝගයක් ලබාදීමට මහේස්ත්‍රාත්වරයාට හැකියාවක් නොමැති බව ද මෙහිදී අවධාරණය කෙරිණි.