ශිවනේසතුරෙයි චන්ද්රකාන්තන් හෙවත් පිල්ලෙයාන්ට ඇප ලබාදීම සම්බන්ධයෙන් නීතිපති දෙපාර්තමේන්තුව සහ පොලිසිය අතර අර්බුදයක් ඇති වී තිබේ.
පිල්ලෙයාන් අත්අඩංගුවට ගත්තේ පසුගිය අප්රේල් 08 වැනිදා අපරාධ පරීක්ෂණ දෙපාර්තමේන්තුව මගිනි. ඉන්පසු ඔහු රඳවාගැනීමේ නියෝග මත රඳවාගෙන ප්රශ්න කරමින් සිටී. තමන් අනීතික ලෙස මෙසේ රඳවාගෙන සිටීමට එරෙහිව පිල්ලෙයාන් විසින් මූලික අයිතිවාසිකම් පෙත්සමක් ද ගොනුකර තිබේ.
ඔහු අත්අඩංගුවට ගෙන තිබුණේ නැගෙනහිර විශ්වවිද්යාලයේ හිටපු උපකුලපති රවීන්ද්රනාත් ශිවසුබ්රමනියම් පැහැරගෙන ගොස් අතුරුදන් කිරීමේ සිද්ධිය සම්බන්ධයෙනි. 2005 වසරේදී කොළඹ, විද්යා මාවතේ පැවැති සම්මන්ත්රණයකින් පසු හිටපු උපකුලපතිවරයා මෙසේ පැහැරගෙන ගොස් තිබිණි.
පසුගිය දිනෙක විමර්ශන නිලධාරීන් සහ නීතිපති දෙපාර්තමේන්තුවේ නිලධාරීන් අතර පැවැති සාකච්ඡාවකදී පිල්ලෙයාන්ට ඇප ලබාදීමට විරුද්ධ නොවිය යුතුය යන්න නීතිපති දෙපාර්තමේන්තුවේ ස්ථාවරය වී ඇත. ඉන්පසු අපරාධ පරීක්ෂණ දෙපාර්තමේන්තුවේ නිලධාරීන් නීතිපති දෙපාර්තමේන්තුවේ ඉහළ නිලධාරීන්ට පිල්ලෙයාන්ට එරෙහිව ඇති චෝදනා සහ සාක්ෂි පිළිබඳව දීර්ඝ ලෙස පැහැදිලි කිරීමෙන් පසු, ඇප ලබාදීමට විරෝධය දැක්වීමට තීරණය කර ඇතැයි විශ්වාස කටයුතු ආරංචි මාර්ග සඳහන් කරයි.