තොරතුරු දැනගැනීමේ අයිතිවාසිකම පිළිබඳ කොමිෂන් සභාවේ සභාපති විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න සිය ධුරයෙන් ඉල්ලා අස්වීමේ ලිපිය ජනාධිපති ලේකම් කාර්යාලය වෙත යොමු කරයි.
මේ ලිපිය යොමුකිරීමත් සමග තොරතුරු දැනගැනීමේ කොමිෂන් සභාවේ පුරප්පාඩු දෙකක් මතු වී තිබේ. මීට පෙර එහි කොමසාරිස් ධුරයක් දැරූ විශ්‍රාමික මහාධිකරණ විනිසුරු රෝහිණී වල්ගම ද ඉවත් විය.
වර්තමාන කොමිෂන් සභාවේ ධුර කාලය අවසන් වීමට නියමිත ව ඇත්තේ 2026 දෙසැම්බර් මාසයේදී ය. දැනටමත් ආණ්ඩුක්‍රම ව්‍යවස්ථා සභාව මගින් කොමසාරිස් ධුරයේ පුරප්පාඩුව සඳහා නාමයෝජනා කැඳවා තිබෙන බව එම සභා ආරංචි මාර්ග සඳහන් කරයි. සභාපති ධුරයේ පුරප්පාඩුව සඳහා ද ඉදිරියේදී නාමයෝජනා කැඳවීමට නියමිත අතර, එම නාමයෝජනා අතරින් තෝරාගන්නා දෙදෙනාට ජනාධිපතිවරයා විසින් පත්වීම් ලබාදීමට නියමිත ය.
කොමිෂන් සභාවේ සභාපති ධුරයෙන් ඉවත් වූ උපාලි අබේරත්න මීට පෙර අතුරුදන්වූවන් පිළිබඳ කාර්යාලයේ සභාපතිවරයා ලෙසත්, ගෝඨාභය රාජපක්ෂ ජනාධිපතිවරයා විසින් පත්කරන ලද 2015-2019 දේශපාලන පළිගැනීම් පිළිබඳ ජනාධිපති විමර්ශන කොමිසමේ සභාපතිවරයා ලෙසත් කටයුතු කළේය.
ආන්දෝලනාත්මක විනිසුරුවරයකු වූ අබේරත්න, මහෙස්ත්‍රාත් ධුරයේ සිට ම කටයුතු කළ ආකාරය සම්බන්ධයෙන් බරපතළ ගැටලු තිබේ. ජ්‍යෙෂ්ඨ මාධ්‍යවේදී වික්ටර් අයිවන් විසින් රචිත නොනිමි අරගලය කෘතියේ දැක්වෙන ආකාරයට ඔහු චූදිත විනිසුරු ලෙනින් රත්නායක වෙනුවෙන් පෙනී සිටි එවකට නීතිපති සරත් එන්. සිල්වාගේ සමීපතමයකු වන අතර, වැඩ තහනමට ලක්වීමෙන් පසු ඔහු ව නැවත සේවයට ගන්නේ ද අගවිනිසුරු ධුරය සමග අධිකරණ සේවා කොමිසමේ සභාපති ධුරයට පත්වූ සරත් එන්. සිල්වා ය. එසේ නැවත අධිකරණ සේවයට පැමිණි උපාලි අබේරත්න ශ්‍රේෂ්ඨාධිකරණ විනිසුරුවරයකු ලෙස ය, විශ්‍රාම ලබන්නේ.