TV දෙරණ අයත් පවර් හවුස් පුද්ගලික සමාගම හසලක තුෂාරට එරෙහිව ගොනු කළ නඩුව අද (10) කොළඹ දිසා අධිකරණයේදී කැඳවා තිබිණි. එහිදී හසලක තුෂාරට එරෙහිව නඩුව අවසන් වන තෙක් අතුරු ඉන්ජන්ෂන් තහනම් ආඥාවක් කොළඹ දිසා අධිකරණ විනිසුරු සඳුන් විතාන විසින් පනවනු ලැබිණි.
පැමිණිලිකරුට සහ පැමිණිලිකරුගේ කාර්යමණ්ඩලයට කවරාකාරයකින් හෝ අපහාසයක් සිදුකිරීමෙන් විත්තිකරු ඇතුළු ඔහුගේ සේවක නියෝජිතාදීන් ද ඔහු මගින් සහ ඔහු යටතේ කටයුතු කරනු ලබන සියලු‍දෙනා ද වළක්වාලනු ලබන ලෙස මේ නියෝගයේ සඳහන් ය.
You Tube අවකාශයේ පවත්වාගෙන යනු ලබන SL vlog Pod Talks නමැති වැඩසටහනේ හසලක තුෂාර සංජීවට එරෙහිව රුපියල් මිලියන 500ක වන්දියක් ඉල්ලා අද දෙරණ අයත් පවර් හවුස් පුද්ගලික සමාගම විසින් මෙම නඩුව ගොනුකර තිබේ.
ආගමික අපහාසයක් සිදු කිරීම යන චෝදනාව යටතේ අත්අඩංගුවට ගත් නතාෂා එදිරිසූරියට ඇප ලබාදීමට අදාළ පුවත අද දෙරණ 6.55 ප්‍රධාන ප්‍රවෘත්ති ප්‍රකාශයෙන් වාර්තා කළ ආකාරය විවේචනය කරමින් SL vlog Pod Talks නමැති වැඩසටහනේදී හසලක තුෂාර සංජීව දෙරණ නාලිකාව විවේචනය කළ බවට ඔහුට චෝදනා එල්ල වී ඇත.
ඒ අනුව දෙරණ නාලිකාව පෙන්වා දෙන්නේ, අදාළ වැඩසටහනේදී දෙරණ නාලිකාව යනු ජඩ, කැත, ජරා, කුජීත, පජාත, අපත, චාටර්, ලැජ්ජා නැති චොර මාධ්‍ය නාලිකාවක් වශයෙන් හසලක තුෂාර විසින් විවේචනය කර ඇති බවයි.