ගාල්ල හිටපු මහේස්ත්‍රාත් ඩී. එස්. මෙරිංචිආරච්චි වහාම අත්අඩංගුවට ගන්නා ලෙස විවෘත වරෙන්තුවක් නිකුත් කෙරිණි.
මෙම වරෙන්තුව ඊයේ (02) නිකුත් කරන ලද්දේ කොළඹ මහාධිකරණ විනිසුරු අමල් රණරාජා විසිනි. ගාල්ල මහේස්ත්‍රාත් ලෙස කටයුතු කරමින් සිටින අතරතුර සිදුකරන ලද වරදකට අදාළ ව මෙරිංචිආරච්චිට දඬුවම් නියම කර තිබිණි. හිටපු මහේස්ත්‍රාත්ට වසර 5ක බරපතළ වැඩ සහිත සිර දඬුවම් නියම කර තිබුණේ පොදු දේපොළ පනත යටතේ ය.
වටිනාකම අඩුවෙන් තක්සේරු කිරීම මගින් රජයට පාඩු සිදුකිරීම යන චෝදනාව යටතේ නීතිපතිවරයා විසින් මෙරිංචිආරච්චිට එරෙහිව අධිචෝදනා ගොනුකර තිබිණි. 2000 වසරේ අප්‍රේල් 04 – 05 දිනවලදී සුරාබදු ආඥා පනත යටතේ වන නඩු දෙකකට අදාළ ව අඩු තක්සේරු කිරීම සම්බන්ධයෙන් මෙරිංචිආරච්චිට එරෙහිව චෝදනා ගොනුකොට තිබිණි.
මෙහිදී අධිකරණයට දැනුම් දෙනු ලැබුවේ චූදිතයා රට හැර ගොස් ඇති බවටයි.